ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މި ސަރުކާރާ އިދިކީލަ ކައުންސިލެއް ހޮވައިގެން އެމަނިކުފާނުގެ ޕްލޭނާއި އެއްގޮތަށް ގައުމު ތަރައްގީކުރަން ދަތިވާނެ ކަމަށް ކުޅިވަރާ ބެހޭ އަބްދުالله ރާފިއު ވިދާޅުވެއްޖެ އެވެ. 

ކޮންގްރެސް ޕާޓީގެ ޓިކެޓުގައި ގަލޮޅު ދެކުނު ދާއިރާއަށް ލޯކަލް ކައުންސިލް އިންތިހާބުގައި ވާދަ ކުރައްވާ ކެންޑިޑޭޓުންގެ ކެމްޕޭން ޖަގަހަ ހުޅުވުމަށް ބޭއްވި ހަފްލާގައި ވާހަކަ ދައްކަވަމުން ވަޒީރު ރާފިއު ވިދާޅުވީ ދިވެހި ރައްޔިތުން، ރައީސުލްޖުމްހޫރިއްޔާ ކަމުގެ މަޤާމަށް ރައީސް ޑރ. މުޙައްމަދު މުޢިއްޒު އައްޔަނު ކުރެއްވީ އެމަނިކުފާނު ރާއްޖެ ތަރައްގީ ކުރަން ބޭނުންވާ ގޮތާއި ޕްލޭން ބަލައިގަންނާތީ ކަމަށެވެ. އަދި އެމަނިކުފާނު އަންނަނީ އެ ކަންްކަން ތަންފީޒު ކުރައްވަން މަސައްކަތް ކުރައްވަމުން ކަމަށެެވެ.

”އެކަން އަޅުގަނޑުމެންނަށް ކިރެވޭނީ އެ ފިކުރާއި އެ ޚިޔާލާއި، އެކަންކަން ކުރަން ބޭނުންވެގެން، އެކަންކަން ތަރުތީބު ކުރައްވާފައި އޮތް ގޮތް އަޅުގަނޑުމެންނަށް ގަބޫލު ކުރެވިގެން، އެކަން ކުރުމަށްޓަކައި އެއްބާރުލުންދޭ ބަޔަކަށް އެބަވާންޖެހޭ މުވައްސަސާތަކުގައި ތިބި ބޭފުޅުން.“ ވަޒީރު އިތުރަށް ވިދާޅުވިއެވެ. 

ކަންމިހެން ހުރުމުން، ރައީސް މުޢިއްޒުގެ ތަޞައްވުރު ހަގީގަތަކަށް ހެދުމަށް، މުވައްސަސާތަކަށް ހޮވާ ބޭފުޅުންނަކީ ކޮންގްރެސް ޕާޓީގެ ކެންޑިޑޭޓުން ކަމުގައިވާންޖެހޭ ކަމަށް ރާފިޢު ވިދާޅުވިއެވެ. އެ ކެންޑިޑޭޓުންނަކީ ރައީސް މުޢިއްޒުގެ ޕްލޭން ތަންފީޒު ކުރައްވަން އެއްބާރުލުން ދެއްވާނެ ބައެއް ކަމުގައިވެސް ރާފިޢު ވިދާޅުވިއެވެ. 

އެހެންކަމުން އެކަމާމެދު ވިސްނަންޖެހޭ ކަމަށްވެސް އޭނާ ވިދާޅުވިއެވެ.