ވެމްކޯގެ މުވައްޒަފުންގެ މަސައްކަތު މާޙައުލުގެ ސަލާމަތާއި ރައްކާތެރިކަމާ ގުޅޭގޮތުން، އަވަސް ތަހުގީގެއް ހިންގަން ހިޔުމަންރައިޓްސް ކޮމިޝަން އޮފް މޯލްޑިވްސް، އެޗްއާރްސީއެމް އިން ނިންމައިފިއެވެ. 

އާދިއްތަ ދުވަހު މާލޭގައި ހުންނަ ވެމްކޯ ސައިޓް ތެރޭގައި ހިނގި ހާދިސާއެއްގަައި މީހަކަށް ބޮޑެތި އަނިޔާތަކެއް ވެގެން އެމީހާއަށް ވެންޓިލޭޓަރުގައި އަންނަނީ ފަރުވާދެމުންނެވެ.

މީގެ އިތުރުން، މިދިޔަ ޖަނަވަރީ މަހުގައި، ތިލަފުށި ވެމްކޯ ސައިޓްގައި މަސައްކަތް ކުރަމުން ދިޔަ ބަންގްލަދޭޝްގެ މީހަކުވެސް ވަނީ ނިޔާވެފައެވެ. އޭނާ ނިޔާވި މައްސަލައިގެ ތަހުގީގަށް ލިބުނު މައުލޫމާތު ހިއްސާކުރަމުން ފުލުހުން އޭރު ބުނީ، އަމީން މިއާ ނަމަކަށް ކިޔާ އެ މީހާ ނިޔާވުމަށް މެދުވެރިވެފައިވަނީ  ޖެނުއަރީ 26 ވަނަ ދުވަހުގެ މެންދުރުގެ ވަގުތެއްގައި ކުނި ޖަމާކޮށްފައިވާ ސައިޓްގެ ބައެއްގައި އެކްސްކެވޭޓަރަކުން ކުނި ނެގުމުގެ މަސައްކަތްކުރަނިކޮށް، އޭގެ ދަތްގަނޑުން ޖެހި ވެއްޓި، އެކްސްކެވޭޓަރުން ކުނިތައް އެތަނުގެ ކައިރިން އެހެން ދިމާލަކަށް ބަދަލުކުރުމުގެ ތެރޭގައި އެ މީހާގެ ހަށިގަނޑާއެކު ކުނިތައް ބަދަލުކުރެވި މީހާގެ ގައިމައްޗަށް ކުނިތަކެއް އެޅިގެން ހިނގި ހާދިސާއެއްގައި ކަމަށެވެ. 

މި ހާދިސާއާ ގުޅިގެން އެކްސްކެވޭޓަރު ދުއްވަން އިން ޑްރައިވަރު ވަނީ ހައްޔަރުކޮށްފައެވެ. 

މި ދެ ހާދިސާ ފުލުހުން ތަހުގީގު ކުރަމުންދާއިރު، އެޗްއާރްސީއެމް އިން ރޭ ބުނީ، ‏ވެމްކޯގެ މަސައްކަތު މާހައުލުގެ ރައްކާތެރިކަމާގުޅޭ ތަފާތު މައްސަލަތައް ތަކުރާރުކޮށް ދިމާވަމުންދާ ކަމަށެވެ.

އެހެންކަމުން، ވެމްކޯގެ މުވައްޒަފުންގެ މަސައްކަތު މާޙައުލުގެ ސަލާމަތާއި ރައްކާތެރިކަމާ ގުޅޭގޮތުން، އަވަސް ތަހުގީގެއް ހިންގަން ރޭ ބޭއްވި ހިޔުމަން ރައިޓްސް ކޮމިޝަނުގެ ބައްދަލުވުމަކުން ނިންމައިފައިވާ ކަމަށެވެ.