ރަސްމާލެ ހިއްކުމުގެ މަޝްރޫއު ބާރު ސްޕީޑްގައި ކުރިއަށްދާ ކަމަށާ މިއަދުގެ ނިޔަލަށް ހުޅުމާލެ ދެ ފިޔަވައްސާ އެއްވަރުގެ ބިމެއް ހިއްކާ ނިމިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ޕީއެންސީން މިރޭ އާޓިފިޝަލް ބީޗުގައި ބޭއްވި "ދިވެހީންގެރާއްޖެ ތަރާވީސް" ގައި ވާހަކަފުޅު ދައްކަވަމުންނެވެ.

ރަސްމާލެ މަޝްރޫއުއަކީ މާލެ ސަރަހައްދުގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރިއަށްގެންދާ ބޯހިޔާވަހިކަމުގެ އެންމެ ބޮޑު މަޝްރޫއު އެވެ. މިރޭގެ ހަފްލާގައި ރައީސް ވިދާޅުވި ގޮތުގައި މިއަދުގެ ނިޔަލަށް 385 ހެކްޓަރުގެ ބިން ވަނީ ހިއްކާނިމިފަ އެވެ. އެއީ ހުޅުމާލެ ދެ ފިޔަވައްސާ އެއްވަރުގެ ބިމެއް ކަމުގައި ވިދާޅުވި އެވެ.

އެމަނިކުފާނު މިރޭވެސް ވިދާޅުވީ ބިން ހިއްކުމުގެ މުޅި މަޝްރޫއު އަންނަ އޭޕްެރީލް މަހުގެ ނިޔަލަށް ނިމޭނެ ކަމަށެވެ.

ކ. ފުށިދިއްގަރުފަޅު ހިއްކައިގެން ރަސްމާލެ ތަރައްގީކުރާ މި މަޝްރޫއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ފެށި އެންމެ އުއްމީދީ ބޯހިޔާވަހިކަމުގެ މަޝްރޫޢެވެ. 2023 ވަނަ އަހަރުގެ ޑިސެމްބަރު މަހު އަމަލީ މަސައްކަތް ފެށި މި މަޝްރޫޢުގައި ޖުމްލަ 1،153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. 

ރަސްމާލެ ހިއްކުމުގެ މަސައްކަތް ބާރު ސްޕީޑުގައި ކުރިއަށް ގެންދިއުމަށްޓަކައި، ދުނިޔޭގައި މިވަގުތު އޮތް އެންމެ ބޮޑު އެއް ޑްރެޖަރު ކަމަށްވާ "ކްރިސްޓޯބަލް ކޮލޯން" ދަނީ ބޭނުންކުރަމުންނެވެ. ޖޭން ޑި ނަލް ކުންފުނީގެ މި ޑްރެޖަރަކީ އެއްފަހަރާ 46,000 ކިއުބިކް މީޓަރުގެ ވެލި ނެގުމުގެ ގާބިލްކަން ލިބިގެންވާ ބިޔަ އުޅަނދެކެވެ.