ބ. ދަރަވަންދޫ ހިއްކަން ނިންމާފައިވާ ކަމަށާ އެއާޕޯޓްގެ ތަރައްގީއަށް މަސައްކަތްތަކެއް ނުކުރެވޭ ކަމަށް ދެކެވޭ ވާހަކަތައް ސަރުކާރުން ދޮގުކޮށްފި އެވެ.
ހަނިފަރަށް ގެއްލުންވާނެ ގޮތަށް ދަރަވަންދޫ ބިންހިއްކަން ނިންމާފައިވާ ކަމަށް ދެކެވޭ ވާހަކަތަކާއި ގުޅިގެން މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. އަބްދުﷲ މުއްޠަލިބު ވިދާޅުވީ އެއީ ހަގީގަތާއި ހިލާފު ވާހަކަތަކެއް ކަމަށެވެ.
ދަރަވަންދޫ ފަޅުން ބައެއް ހިއްކުމުގެ ޕްލޭނެއްގެ މަސައްކަތް މިދިޔަ އަަހަރު ކުރިނަމަވެސް ބިން ހިއްކުމުގެ އެއްވެސް މަޝްރޫޢުއެއް ކުރިއަށް ގެންދަން ރަސްމީކޮށް ނިންމާފައިނުވާ ކަމަށް ވިދާޅުވި އެވެ.
އަދި ވިދާޅުވީ އެފަދަ ނިންމުމެއް ނިންމާނަމަ އެކަން ކައުންސިލަށް ހިއްސާކުރާނެ ކަމަށެވެ.
މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން މިރޭ ވިދާޅުވި ގޮތުގައި ދަރަވަންދޫ އެއާޕޯޓް އިތުރަށް ތަރައްގީ ކުރުމަށް ސަރުކާރުން ދަނީ މަސައްކަތް ކުރަމުންނެވެ. އެގޮތުން އެއާޕޯޓުން ދޭ ހިދުމަތްތައް ރަނގަޅުކޮށް ވަސީލަތްތައް ރަނގަޅުކޮށް ޒަމާނީ ކުރުމުގެ މަސައްކަތް ކުރާން ވަނީ ނިންމާފަ އެވެ.
ދަރަވަންދޫ އެއާޕޯޓަކީ އެންމެ ބާރުބޮޑު ޑޮމެސްޓިކް އެއާޕޯޓެވެ. ނަމަވެސް އެއާޕޯޓްގެ ތަރައްގީއަށް އެކަށީގެންވާ މަސައްކަތްތަކެއް ކުރެވިފައިނުވާ ކަމަށް އެ ރަށު ކައުންސިލުން ބުނެ އެވެ.
މި ސަރުކާރުން ވަނީ ދަރަވަންދޫ އެއާޕޯޓް ތަރައްގީކޮށް ދޭނެ ކަމަށް ބުނެފަ އެވެ.
Advertisement
This content is created and paid for by advertisers and does not involve Voice Journalists
