ތ.ވިލުފުށި އެއާޕޯޓް ތަރައްޤީކުރުމަށް ބޭނުންވާ ބިން ހިއްކުމުގެ މަސައްކަތުގެ 98 އިންސައްތަ ނިމިފައިވާކަމަށް އެމްއޭސީއެލުން ބުނެފިއެވެ.

އެމްއޭސީއެލުން ބުނީ، ވިލުފުށި ބިންހިއްކުމުގެ މަސައްކަތް ނިމުމަކާ ހަމަޔަށް އައިސްފައިވާކަމަށެވެ. މިގޮތުން އަންނަ ހަފްތާގެ ތެރޭގައި ބިން ހިއްކުމުގެ މަސައްކަތް މުޅިން ނިންމާލެވޭނޭކަމަށް އެކުންފުނިން ވަނީ ބުނެފައެވެ. ވިލުފުށީގައި އެއާޕޯޓެއް ތަރައްޤީކުރުމަށް ހިންކަންޖެހޭ ބިމުގެ ތެރެއިން މިވަގުތަށް 79 ހެކްޓަރު ހިއްކައި ނިމިފައިވާއިރު، ހިއްކަން ޖެހެނީ 80 ހެކްޓަރެވެ.

ވިލުފުށި ބިން ހިއްކުމުގެ ތެރެއިން.. ފޮޓޯ: އެމްއޭސީއެލް

ވިލުފުށި ބިން ހިއްކުމުގެ މަސައްކަތް ކުރިއަށްގެންދަނީ، ފިލިއްޕޯ ބްރޫނެލްޝީ ނަމަކަށް ކިޔާ ޑްރެޖަރެއް ބޭނުންކޮށްގެންނެވެ. މިއީ ކެޕޭސީޓީގައި 11،300 ކިއުބިކް މީޓަރުގެ ވެލި ނެގުމުގެ ގާބިލްކަން ލިބިގެންވާ ޑްރެޖަރެކެވެ.

އެމްއޭސީއެލްއިން ވިލުފުށި ބިން ހިއްކުމުގެ މަސައްކަތް ފަށާފައިވަނީ މިދިޔަ އަހަރުގެ ނޮވެމްބަރުމަހުގެ 14 ވަނަ ދުވަހެވެ. އެ މަސައްކަތް ފަށާފައިވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެރަށަށް ކުރެއްވި ޒިޔާރަތުގެ ތެރެއިންނެވެ.

ވިލިފުށީގައި ތަރައްޤީކުރުމަށް ނިންމާފައިވަނީ 1800 މީޓަރުގެ ރަންވޭއެއް ހިމެނޭ އެއާޕޯޓެކެވެ. މި މަސައްކަތް ދެ އަހަރާއި 6 މަސްދުވަހުގެ ތެރޭގައި ނިންމަންޖެހެއެވެ.