އީރާނުގެ ރޫޙާނީ އިސްލީޑަރު އާޔަތުالله އަލީ ޚާމަނާއީ އަވަހާރަކޮށްލާފައިވާކަން އެގައުމުގެ ދައުލަތުގެ މީޑިއާއިން ކަށަވަރުކޮށްދީފިއެވެ. ޚާމަނާއި އަވަހާރަވީ އެމެރިކާއާއި އިޒްރޭލުން ގުޅިގެން އީރާނަށް ދެމުންދާ ވަރުގަދަ ޙަމަލާތަކުގެ ތެރެއިންނެވެ.

އީރާނުގެ ފާރްސް އަދި ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، ޚާމަނާއީ އަވަހާރަވީ އިއްޔެގެ އިރާކޮޅު ވަގުތެއްގައި އޮފީހުގައި ރަސްމީ މަސައްކަތްޕުޅުގައި ހުންނަވަނިކޮށް ދިން ޙަމަލާއެއްގައެވެ. މި ޙަމަލާގައި ޚާމަނާއީގެ އިތުރުން އެމަނިކުފާނުގެ ދަރިކަނބަލުންނާއި، ދަނބިދަރިކަލުން އަދި ކާފަދަރިކަލުންވެސް ވަނީ އަވަހާރަވެފައެވެ.

މި ހާދިސާއާ ގުޅިގެން އީރާނުގެ ސަރުކާރުން ވަނީ ގައުމީ ހިތާމައިގެ 40 ދުވަސް އިޢުލާންކޮށްފައެވެ.

އެމެރިކާގެ ރައީސް ޑޮނަލްޑް ޓްރަމްޕް އާއި އިސްރާއިލުން މީގެ ކުރިން ވަނީ،  އުމުރުފުޅުން 86 އަހަރުގެ ޚާމަނާއީ އާއި އީރާނުގެ އެހެން ބައެއް ލީޑަރުން އަވަހާރަކޮށްލާފައިވާކަން އިއުލާންކޮށްފައެވެ. ނަމަވެސް، އީރާނުން އޭރު އެކަން ދޮގު ކުރި އެވެ. 

އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނާ ދެކޮޅަށް "މޭޖަރ ކޮމްބެޓް އޮޕަރޭޝަންސް" ނުވަތަ ވަރުގަދަ އަސްކަރީ އޮޕަރޭޝަނެއް ފަށާފައިވާކަން ރަސްމީކޮށް އިޢުލާންކޮށްފައެވެ. އިޒްރޭލުން ހޮނިހިރު ދުވަހު ދޭން ފެށި މިސައިލް ޙަމަލާތަކަށްފަހު ޓްރަމްޕް ބުނީ، އެމެރިކާގެ މަގްސަދުތައް ހާސިލްވަންދެން، ކުރިއަށް އޮތް ހަފްތާގައިވެސް ނުވަތަ ބޭނުންވާ މުއްދަތަކަށް މެދުނުކެނޑި ބޮން އެޅުން ކުރިއަށް ގެންދާނެ ކަމަށެވެ.

މި ޙަމަލާތަކުގެ ސަބަބުން އީރާނަށް ބޮޑެތި ގެއްލުންތަކެއް ދަނީ ލިބެމުންނެވެ. އީރާނުގެ ދައުލަތުގެ މީޑިއާއިން ބުނާ ގޮތުގައި، އެގައުމުގެ ދެކުނުގެ ސްކޫލަކަށް ދިން ޙަމަލާއެއްގައި އެކަނިވެސް މަދުވެގެން 108 މީހުން ވަނީ މަރުވެފައެވެ. އަދި އީރާނުގެ 24 ޕްރޮވިންސަކުން ޖުމްލަ 201 އަށްވުރެ ގިނަ މީހުން މިހާތަނަށް މަރުވެފައިވާ ކަމަށް ރިޕޯޓްތައް ބުނެއެވެ.

އީރާނުން ދަނީ މި ޙަމަލާތަކުގެ ބަދަލުހިފުމުގެ ގޮތުން އިޒްރޭލަށާއި، މެދުއިރުމަތީގެ އެކި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ޙަމަލާދެމުންނެވެ. އީރާނުގެ ޙަމަލާތައް އަމާޒުވެފައިވާ ގައުމުތަކުގެ ތެރޭގައި ގަތަރު، ޔޫއޭއީ، ކުވެއިތު، ބަހްރެއިން، އުރުދުން، ސައުދީ އަރަބިއްޔާ އަދި އިރާގު ހިމެނެއެވެ.

1989 ވަނަ އަހަރުން ފެށިގެން އީރާނުގެ އެންމެ މަތީ ވެރިޔާގެ މަގާމުގައި ހުންނެވި ޚާމަނާއީއަކީ އެ ގައުމުގެ ސަރުކާރާ، އަސްކަރިއްޔާ އަދި ޝަރުއީ ދާއިރާގެ މައްޗަށް އެންމެ ފަހުބަސް ވިދާޅުވާ ފަރާތެވެ.