އެމެރިކާ އާއި އިޒްރޭލުން ދެމުންދާ ވަރުގަދަ ހަމަލާތަކުގައި އީރާނުގެ އެންމެ މަތީ ލީޑަރު އާޔަތުالله އަލީ ޚާމަނާއީ އާއި ސަލާމަތީ ބާރުތަކުގެ އިސްވެރިން އަވަހާރަކޮށްލުމާ ގުޅިގެން، އޭގެ ބަދަލުހިފުމުގެ ގޮތުން އިޒްރޭލާއި އެމެރިކާގެ މަރުކަޒުތަކަށް މިސައިލް ހަމަލާތަކެއް އޮއްސާލާނެ ކަމަށް އީރާނުން އިންޒާރު ދީފިއެވެ.

އެމެރިކާއާއި އިސްރާއިލު ގުޅިގެން އިރާނަށް ދެމުންދާ ހަމަލާތަކުގައި ޚާމަނާއީގެ އިތުރުން، އެމަނިކުފާނުގެ ދަރިކަނބަލުންނާއި، ދަނބިދަރިކަލުން އަދި ކާފަދަރިކަލުން ވެސް ވަނީ އަވަހާރަވެފައެވެ. އީރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ގައުމުގެ 24 ޕްރޮވިންސަކަށް ދެވުނު މި ހަމަލާތަކުގައި މިހާތަނަށް މަދުވެގެން 201 މީހުން ވަނީ މަރުވެފައެވެ.

އީރާނުގެ ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނީ ބަދަލުހިފުމުގެ މަސައްކަތް މިހާރު ފަށާފައިވާ ކަމަށެވެ. އެގޮތުން މެދުއިރުމަތީގައި އެމެރިކާ ސިފައިން ތިބޭ 27 ބޭހަކަށާއި، އިޒްރޭލުގެ ތަލް އަވީވްގައި ހުރި އަސްކަރީ މަރުކަޒުތަކަށް އަމާޒުކޮށް ހަމަލާ ދޭންފަށާފައިވާ ކަމަށް އީރާނުން ބުނެއެވެ. މި ހަމަލާތަކުގެ އަސަރު ގަތަރާއި ޔޫއޭއީއަށް ވެސް ކުރަމުންދާއިރު، އެ ގައުމުތަކުން ބާރުގަދަ ގޮވުންތަކުގެ އަޑު އިވެމުންދާ ކަމަށް ރިޕޯޓްތައް ބުނެއެވެ.

އީރާނުގެ ރައްދު ހަމަލާތައް އަމާޒުވެފައިވަނީ އިޒްރޭލުގެ އިތުރުން ގަތަރު، ޔޫއޭއީ، ކުވެއިތު، ބަހްރޭން، އުރުދުން، ސައުދީ އަރަބިއްޔާ އަދި އިރާގުގައި ހުރި އެމެރިކާގެ މަރުކަޒުތަކަށެވެ. މަސްރަހު ގޯސްވުމާ ގުޅިގެން ސަރަހައްދުގެ ގިނަ ގައުމުތަކަކުން ވަނީ އެ ގައުމުތަކުގެ ވައިގެ ސަރަހައްދު ބަންދުކޮށްފައެވެ.

އީރާނުގެ އިންޒާރާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނަށް ވަރުގަދަ އިންޒާރެއް ދީފައެވެ. ޓްރަމްޕް ބުނީ، އީރާނުން މިއަދު އެއްވެސް ވަރުގަދަ ހަމަލާއެއް ދީފިނަމަ، މީގެ ކުރިން ދުވަހަކުވެސް ނުފެންނަ ފަދަ ވަރުގަދަ ބާރަކާއެކު އީރާނަށް ހަމަލާދޭނެ ކަމަށެވެ.

ގައުމުގެ އެންމެ މަތީ ލީޑަރު އަވަހާރަވުމާ ގުޅިގެން، އީރާނުގެ ސަރުކާރުން ބުނެފައިވަނީ އާ ލީޑަރަކު އިންތިޚާބު ކުރެވެންދެން ގައުމު ހިންގާނީ ރައީސް މަސްއޫދު ޕެޒެޝްކިއަން ހިމެނިވަޑައިގަންނަވާ ވަގުތީ ކައުންސިލަކުން ކަމަށެވެ.