މެދުއިރުމަތިގެ މަޝްރަހް ގޯސްވެފައިވާ މި ދަނޑިވަޅުގައި ކުރާ އަސަރު ކުޑަކުރުމަށް އޭޝިއާގެ ސަރަހައްދުތަކުގެ އެއާލައިންތައް ރާއްޖެއަށް ގެނައުމާ ގުޅޭގޮތުން މަޝްވަރާ ކުރެވެމުންދާކަމަށް ޓްރާންސްޕޯޓް އެންޑް ސިވިލް އޭވިއޭޝަނުން ބުނެފިއެވެ.

ސިވިލް އޭވިއޭޝަނުން ނެރެފައިވާ ބަޔާނެއްގައި ބުނެފައިވަނީ، މެދުއިރުމަތީގެ މަސްރަހަށް އަންނަމުންދާ ބަދަލުތަކާއެކު، އެ ސަރަހައްދުގެ ވައިގެ ސަރަހައްދު ބޭނުންކުރުމުގައި އަޅާފައިވާ ފިޔަވަޅުތަކާ ގުޅިގެން ކުރިމަތިވަމުން އަންނަ ހާލަތު ވަރަށް ރަނގަޅަށް މޮނިޓަރ ކުރަމުން އަންނަކަމަށެވެ.

މެދުއިރުމަތިން ރާއްޖެއަށް ދަތުރުކުރާ ބައެއް އެއާލައިންތަކުގެ ދަތުރުތަކުގެ ޝެޑިއުލަށް ބަދަލު އައިނަމަވެސް، އެހެނިހެން އެއާލައިންތަކުގެ ދަތުރުތައް ތާވަލާ އެއްގޮތަށް ކުރިއަށްދާކަމަށާއި، މިހާލަތުގެ ސަބަބުން ކުރާ އަސަރުތައް ކުޑަކުރުމަށް ދެކުނު އިރުމަތީ އޭޝިއާ، އިރުމަތީ އޭޝިއާ އަދި އިންޑިއާގެ އިތުރު އެއާލއިންތައް ރާއްޖެއަށް ގެނައުމާ ގުޅޭގޮތުން މިނިސްޓްރީން އެފަރާތްތަކާއެކު މުއާމަލާތްތައް ކުރިއަށްދާކަމަށް މިނިސްޓްރީން ބުންޏެވެ. 

މެދުއިރުމަތިން ރާއްޖެއަށް ކުރާ ދަތުރުތަަކީ ރާއްޖޭގެ އިގްތިސާދާ ގުޅިފައިވާ މުހިންމު ދަތުރުތަކެއްކަން ފާހަގަކުރަމުން މިނިސްޓްރީން ބުނީ އަންނަމުންދާ ބަދަލުތަކާ ގުޅިގެން ރާއްޖެއަށް ޒިޔާަރތްކުރާ މައިގަނޑު އެއާލައިންތަކާއި، ކަމާގުޅޭ ބައިނަލްއަޤްވާމީ އިދާރާތަކާ ގުޅިގެން މިނިސްޓްރީން މަސައްކަތްތަކެއް ކުރަމުންގެންދާކަމަށެވެ. މިނިސްޓްރީގެ އެންމެ އިސް އަމާޒަކީ ރާއްޖެއަށް ޒިޔާރަތްކުރާ ފަތުރުވެރިންނަށާއި، ރާއްޖެއިން ބޭރަށް ދަތުރުކުރާ ދިވެހިންނާއި ރާއްޖޭގައި ދިރިއުޅޭ މީހުންނަށް ކުރިމަތިވެދާނެ ދަތިތައް ކުޑަކުރުން ކަމަށްވެސް ވަނީ ބުނެފައެވެ.