ގަލްފް ގައުމުތަކުގެ ވައިގެ ސަރަހައްދު ބަންދުކުރުމާ ގުޅިގެން ފްލައިޓްތައް ކެންސަލްވި ފަތުރުވެރިންގެ ވިސާ އިތުރުކޮށްދިނުމަށް ނިންމާފައިވާކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.
އިމިގްރޭޝަނުން ބުނީ މެދުއިރުމަތީގައި މިމަހުގެ 28 ވަނަ ދުވަހު ފެށުނު ހަމަނުޖެހުންތަކުގެ ސަބަބުން ދަތުރުފަތުރުގެ ނިޒާމަށް ބުރޫ އަރައި ބައެއް ފްލައިޓްތައް ކެންސަލްވެފައިވާކަމަށެވެ. އެކަމުގެ ސަބަބުން ރާއްޖޭގައި މިވަގުތު ތިބި ބައެއް ފަތުރުވެރިންނަށް ވިސާ ހަމަވުމުގެ ކުރިން ފުރޭނެ އިންތިޒާމު ހަމަޖެހިފައި ނެތުމުން އެފަރާތްތަކުގެ ޓޫރިސްޓް ވިސާ އިތުރުކޮށް ދިނުމަށް ނިންމާފައިވާކަމަށް އިމިގްރޭޝަނުން ބުންޏެވެ.
އިމިގްރޭޝަނުން މިގޮތަށް ނިންމުމުން ޓޫރިޒަމް ސިނާއަތުގައި ހަރަކާތްތެރިވާ ފަރާތްތަކުން ވަނީ އެކަމަށް މަރުހަބާކިޔައި މިއީ މި ދަނޑިވަޅުގައި އެފަރާތްތަކަށާއި ފަތުރުވެރިންނަށްވެސް ލިބިގެންދިޔަ ވަރަށްބޮޑު ހިތްހަމަ ޖެހުމެއްކަން ފާހަގަކޮށްފައެވެ.
އެމެރިކާ އަދި އިސްރާއީލުން އިސްވެ އީރާނަށް ދިން ހަމަލާތަކާއެކު އީރާނުން ވަނީ އެމެރިކާގެ އަސްކަރީ ބޭސްތައް ހުންނަ ތަންތަނަށް ހަމަލާދީފައެވެ. އެއާއެކު އެ ޤައުމުތަކުން ވަނީ ވައިގެ ދަތުރުތައް މެދުކަނޑާލާފައެވެ. އަދި ސައުދީ ފިޔަވައި ޤަތަރު، ދުބާއީ ފަދަ ޤައުމުތަކުން ވަނީ ވައިގެ ސަރަހައްދުވެސް ބަންދުކޮށްފައެވެ. އެއާއެކު މެދުއިރުމައްޗަށް ކުރަމުން އައި ދަތުރުތައް ވަނީ މުޅިންހެން ހުއްޓުމަކަށް އައިސްފައެވެ.
ރާއްޖެއަށް އަންނަ ފަތުރުވެރިންގެ ބޮޑު އިންސައްތައެއް އަންނަނީ މެދުއިރުމަތި ރޫޓުންނެވެ. މެދުއިރުމަތީގެ ފްލައިޓްތައް ކެންސަލް ވުމުގެ ސަބަބުން ރާއްޖޭގައި ވަރަށް ގިނަ އަދަދެއްގެ ފަތުރުވެރިން މިހާރުވެސް ނުފުރިފައި އެބަތިއްބެވެ.
Advertisement
This content is created and paid for by advertisers and does not involve Voice Journalists
