ޚާމަނާއީ އަވަހާރަކޮށްލުން ކުށްވެރިކުރަން, ދުއާއަކީ އީރާނަށް ބާރު ދެއްވުން: މައުމޫން
އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުން އެންމެ ހަރުއަޑުން ކުށްވެރިކުރައްވާ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.
އެމަނިކުފާނު ވަނީ އެކްސްގައި ކުރެއްވި ޕޯސްޓެއްގައި އެކަން ހާމަކުރައްވާފަ އެވެ. އިނގިރޭސިބަހުން ކުރެއްވި ޕޯސްޓްގައި ރައީސް މައުމޫން ވިދާޅުވީ އިޚްލާސްތެރި މުސްލިމެއްގެ ހައިސިއްޔަތުން އެ އަނިޔާވެރި އަމަލު އެމަނިކުފާނު ކުށްވެރި ކުރާ ކަމަށެވެ. އަދި ފުން ހިތާމަވެރި މި ވަގުތުގައި ޚާމަނާއީގެ ފުރާނަފުޅަށް ރަޙްމަތްލައްވައި އާއިލާއާ އީރާންގެ ރައްޔިތުންނަށް ބާރު ދެއްވުން އެދި ދުޢާ ކުރައްވާ ކަމަށެވެ.
ރައީސް މައުމޫނަކީ އަރަބި އިސްލާމީ ގައުމުތަކާއި ވަރަށް ޚާއްސަ އެހާމެ ގާތްގުޅުމެއް ބޭއްވެވި ލީޑަރެކެވެ. އެމަނިކުފާނަކީ އިސްލާމީ ދުނިޔޭގައި ވަރަށް މަގުބޫލު ލީޑަރެއްވެސް މެ އެވެ. މުސްލިމު / އަރަބި ގައުމުތަކަށް ކުރިމަތިވާ މިފަދަ ކޮންމެ ކަމެއްގައި އެމަނިކުފާނު ބަސްފުޅު ވިދާޅުވެ އެވެ.
ވެރިކަމުގެ 30 އަހަރުވެސް އެންމެ ބޮޑު އިސްކަމެއް ދެއްވީ އިސްލާމީ ގައުމުތަކާއި އޮންނަ ގުޅުން ހަރުދަނާ ކުރެއްވުމަށެވެ. އަދި އިސްލާމީ ގައުމުތަކުގެ އެއްބައިވަންތަކަމަށް ވަރަށް ބޮޑަށް ވަކާލާތު ކުރައްވާ އެކަމަށް ބާރުއެޅުއްވި އެވެ.
އީރާނަށް ތަފާތު ތުހުމަތުތައް އަމާޒުކުރުމަށް ކުއްލި ގޮތަކަށް ހަނގުރާމަ ފަށާ އެމެރިކާއާ އިޒްރޭލު ގުޅިގެން އީރާނަށް ވަރުގަދަ ހަމަލާތަކެއް ދިނީ މީގެ ދެ ދުވަސްކުރީންނެވެ. ފުރަތަމަ ވެސް ހަމަލާތައް އަމާޒު ކުރީ އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލެވުމަށެވެ. ކަން ދިމާކުރި ގޮތުން އެ ހަމަލާތައް ކާމިޔާބުވި އެވެ.
އީރާންގެ ލީޑަރުން ވިދާޅުވާ ގޮތުގައި ހަމަލާ އަމާޒުވާނެ ކަން ޔަގީން ކުރެވޭތީ ރައްކާތެރި ތަނަކަށް ބަދަލުވެވަވަޑައިގަތުމަށް އެމަނިކުފާނަށް ތަކުރާރުކޮށް ދެންނެވި އެވެ. ނަމަވެސް އީރާންގެ 96 މިލިއަން ރައްޔިތުންނަށް ނެތް ރައްކާތެރި ކަމެއް ހޯއްދަަވަން ޚާމަނާއީ ދެކޮޅު ހެއްދެވީ އެެވެ. އެހެން ކަމުން ރަސްމީ މަސައްކަތްޕުޅުގައި އެމަނިކުފާނުގެ އޮފީސްކޮޅުގައި އިންނެވީ އެވެ.
Advertisement
This content is created and paid for by advertisers and does not involve Voice Journalists
