ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ ހައްލުކުރުމުގެ މަސައްކަތް ކުރައްވާ ކަމަށް މިނިސްޓާ އޮފް ސިޓީސް، ލޯކަލް ގަވާމަންޓް އެންޑް ޕަބްލިކް ވާކްސް އާދަމް ޝަރީފް އުމަރު ވިދާޅުވެއްޖެ އެވެ. 

އެކްސްގައި މިއަދު ކުރެއްވި ޕޯސްޓެއްގައި މިނިސްޓަރު ވިދާޅުވީ ފަތުރުވެރިކަމާއި އެނޫން ވެސް އިގްތިސާދީ ފުރުސަތުތައް ފަހިވެފައިވާ ކުދިކުދި އާބާދީތަކުގެ ކައުންސިލު އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އިތުރުވަމުން ކަމަށެވެ. 

''މި މައްސަލަ ހައްލު ކުރުމަށް ގުޅުންހުރި މުއައްސަސާތަކާއެކު މި ދަނީ މަސައްކަތް ކުރަމުން'' މިނިސްޓަރުގެ ޕޯސްޓްގައި ވިދާޅުވި އެވެ.

މިނިސްޓަރު މިހެން ވިދާޅުވީ ވ. ރަކީދޫ ކައުންސިލް އިދާރާ އެރަށު ރައްޔިތުން ބަންދުކުރުމާއި ގުޅިގެންނެވެ. ރައްޔިތުން އެކަން ކުރީ ކައުންސިލްގެ އިދާރީ ހުރިހާ މުވައްޒިފުންނާއި ކައުންސިލްގެ ނާއިބު ރައީސާއި އިތުރު މެންބަރަކު އިސްތިއުފާ ދެއްވާ ހިދުމަތްތަކަށް ބުރޫ އެރުމުންނެވެ.

ރަކީދޫއަކީ ހަތްދިހަ ވަރަކަށް މީހުން އުޅޭ ރަށެކެވެ. ވ އަތޮޅުގެ އެންމެ އާބާދީ ކުޑަ އެއް ރަށެވެ.