ބ.ގޮއިދޫ ދަނޑުތަކުގައި ޕެސްޓިސައިޑްގެ ހާލަތު އޮތް މިންވަރު ދެނެގަތުމުގެ މަސައްކަތް ފަށާފައިވާކަމަށް ދަނޑުވެރިކަމާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ބ.ގޮއިދޫގައި ކެންސަރު ބަލިޖެހޭ މީހުންގެ އަދަދު އިތުރުވެ، އެރަށު ދަނޑުތަކުގައި ޕެސްޓިސައިޑް ބޭނުންކުރާ މިންވަރު ބެލުމަށް އިންސްޕެކްޝަނެއް ހިންގައިދިނުމަށް ގޮއިދޫ ރައްޔިތަކު ވަނީ އެކަން ސަރުކާރުގެ ކަމާ ބެހޭ އިދާރާއަށް ހުށަހަޅާފައެވެ. ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި މިކަމާ ގުޅޭގޮތުން ނޫސްވެރިއަކު ކުރި ސުވާލެއްގެ ޖަވާބުގައި މިނިސްޓަރު މާރިއާ ވިދާޅުވީ، މޯލްޑިވްސް ފުޑް އެންޑް ޑްރަގް އޮތޯރިޓީން އެކަމާ ގުޅޭގޮތުން ކުރަންޖެހޭ ޓެސްތްތަކާއި ރީސާޗްތައް ހެދުމުގެ މަސައްކަތް މިހާރު ކުރިއަށްދާކަމަށެވެ.
ދަނޑުވެރިކަމާ ބެހޭ ވަޒީރު ޑރ. މަރިޔަމް މާރިޔާ .. ފޮޓޯ: ރައީސް އޮފީސް
މިނިސްޓަރު ވިދާޅުވީ އެކަމުގައި ސަރުކާރުގެ ފަރާތުން އެމްއެފްޑީއޭއަށް ދޭންޖެހޭ އެއްބާރުލުން ދެމުންދާކަމަށާއި، އުއްމީދަކީ އެކަމުގައި އަވަސް ހައްލެއް ލިބިގެންދިއުންކަމަށެވެ. މިނިސްޓަރު ވިދާޅުވީ ޕެސްޓިސައިޑް ޤާނޫނެއް އޮތްނަމަވެސް އެކަމާ ގުޅޭގޮތުން އަދި އެއްވެސް ޕޮލިސީއެއް ހެދިފައިނުވާކަމަށެވެ.
އަޅުގަނޑުމެން މިދިޔަ އަހަރު ވަނީ ޕޮލިސީއެެއް ހަދަން ފަށާފައި. އިރާދަކުރެއްވިއްޔާ މި ޕޮލިސީ ވަރަށް އަވަހަށް ތަންފީޒުވެގެންދާނެ
ދަނޑުވެރިކަމާ ބެހޭ ވަޒީރު ޑރ. މަރިޔަމް މާރިޔާ
ގޮއިދޫގައި ކެންސަރު ޖެހޭ މީހުންގެ އަދަދު އިތުރުވެ، އެރަށު ރައްޔިތެއްކަމަށްވާ ޝަހްލާ ވަޖީހު ވަނީ ދަނޑުވެރިކަމާބެހޭ މިނިސްޓްރީ އަށާއި، ހެލްތް މިނިސްޓްރީއަށް ސިޓީއެއް ފޮނުވާފައެވެ. މި ސިޓީގައި އޭނާ ބުނެފައިވަނީ މިދިޔަ ފަސް އަހަރެއްހާ ދުވަހުގެ ތެރޭގައި ކެންސަރުޖެހިގެން ގޮއިދޫއިން 5 މީހަކު ނިޔާވެފައިވާކަމަށެވެ. އެހެންކަމުން ކެންސަރު ބައްޔާއި އެރަށު ދަނޑުތަކުގައި ޕެސްޓިސައިޑް ބޭނުންކޮށްގެން ދަނޑުވެރިކަން ކުރުމާ އެއްވެސް ގުޅުމެއް ވޭތޯ ބަލައިދިނުމަށް އެދޭކަމަށެވެ.
ގޮއިދޫ ދަނޑެއްގައި އިންދާފައިހުރި މިރުސްގަހެއްގައި މިރުސް އަޅާފައި.... ފޮޓޯ؛ ވޮއިސް
އޭނާގެ ސިޓީގައި ވަނީ ގޮއިދޫއިން ދަނޑުހެއްދުމަށް ބިންތައް ދޫކޮށްފައިވާއިރު، އޭގެ ތެރެއިން 95 އިންސައްތަ ބިން ބިދޭސީންގެ އަތްމައްޗަށް ދަނޑުވެރިކަންކުރުމަށް ދޫކޮށްލާފައިވާކަމަށެވެ. އެހެންކަމުން ދަނޑުތަކުގައި ހައްދާ ތަރުކާރީ އާއި މޭވާގެ ބާވަތްތަކަކީ ޕެސްޓިސައިޑުން ފަދަ ކެމިކަލް އެކުލެވޭ ބާވަތްތަކުން ތަޣައްޔަރުވެފައިވާ ތަކެތި ކަމަށްވެސް ސިޓީގައި ވަނީ ފާހަގަކޮށްފައެވެ.
މި މައްސަލަ ފެންމަތިވެފައިވަނިކޮށް ދަނޑުވެރިކަމާ ބެހޭ ވުޒާރާއިން އޭރު ވަނީ ދަނޑުވެރިކަން ކުރުމުގައި ޕެސްޓިސައިޑް ގަވާއިދާ ހިލާފަށް ބޭނުންކުރާކަން ފާހަގަވާކަމަށްބުނެ ބަޔާނެއްވެސް ނެރެފައެވެ.
Advertisement
This content is created and paid for by advertisers and does not involve Voice Journalists
