ހިޔާ ފުލެޓްތައް ކުއްޔަށް ދިނުން ހުއްޓުވަން ގާނޫނު އިސްލާހުކުރަނީ
ހިޔާ ފުލެޓްތައް ކުއްޔަށް ދޫކުރުން ހުއްޓުވަން ގާނޫނަށް އިސްލާހް ގެނައުމުގެ މަސައްކަތް ސަރުކާރުން ކުރަމުންދާ ކަމަށް ހައުސިން މިނިސްޓަރު ޑރ. އަބްދުالله މުއްޠަލިބު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، ހައުސިން މަޝްރޫޢުގެ ދަށުން ސަރުކާރުން ދޫކޮށްފައިވާ ހިޔާ ފުލެޓްތައް ކުއްޔަށް ދޫކުރުމަކީ ސަރުކާރުން އެއްވެސް ވަރަކަށް ތާއީދުކުރާ ކަމެއް ނޫން ކަމަށެވެ.
އަދި 4000 ފުލެޓް ދޫކޮށްފައި ވަނީ ރެންޓު ޓު އޯން މޮޑެލްގައި ކަމަށް ވުމުން އެ ފުލެޓްތައް ކުއްޔަށް ދޫކުރާ ނަމަ ފިޔަވަޅު އަޅަން ފަސޭހަ ވާނެ ކަމަށެވެ. އެހެނީ ގާނޫނީ ގޮތުންވެސް އެ ފުލެޓްތައް ކުއްޔަށް ދިނުން އޮތީ މަނާ ކޮށްފައި ކަމަށް ވިދާޅުވިއެވެ.
އެހެން ނަމަވެސް ހިޔާ ފުލެޓާއި ދެން ހުރި ފުލެޓަތައް ކުއްޔަށްދޭ ފަރާތްތަކަށް ފިޔަވަޅު އެޅުމުގައި ހުރަސްތަކެއް ހުރި ކަމަށް ވަޒީރު ވިދާޅުވިއެވެ.
އެތަންތަނަކީ ސޭލް ޕާޗޭސް އެގްރީމަންޓެއްގެ ދަށުން ދީފައިހުރި ތަންތަން. ދެން އޭގައި މި އިންނަނީ، ހިޔާ ފުލެޓް އެގްރީމަންޓްގައިވެސް މި އިންނަނީ، ގާނޫނުގައި ކަނޑައަޅާފައިވާ މަނާ ކަމެއް ނުކުރެވޭނެއޭ… މިހާރު އިން އެގްރީމަންޓްގައި ބަޔާންކޮށްފައެެއް ނެތް ކުއްޔަށް ނުދެވޭނެއޭ. ނަމަވެސް ސޯޝަލް ހައުސިން ސްކީމް ހިންގާ މަގުސަދާ އުސޫލުތަކާ ސިޔާސަތުތަކަށް ބަލާއިރު އެއީ ކުރެވޭނެ ކަމެއް ނޫން.
ހައުސިން މިނިސްޓަރު ޑރ. އަބްދުالله މުއްޠަލިބު
މީގެ އިތުރުން ހިޔާ ފުލެޓްތައް ކުއްޔަށް ދިނުމުގެ މައްސަލަތައް ހައްލުކުރުމަށް މިހާރުވެސް އެޗްޑީސީން މަސައްކަތް ކުރަމުންދާ ކަމަށާ، އެގޮތުން އެފަދަ ފަރާތްތަކަށް ނޯޓިސްދީ އެތަންތަނުގައި އެހެން މީހުންނަށް އުނދަގޫވާގޮތަށް ކުރަމުންދާ މަސައްކަތްތައް ހުއްޓުވަމުންދާ ކަމަށް ވަޒީރު ވިދާޅުވިއެވެ.
މިވަގުތު ސަރުކާރުން ދެކަމެއް މި ކުރަނީ. އެއް ކަމަކީ، ހިޔާ ފުލެޓްގައި ދިރިއުޅޭ ރައްޔިތުންނަށް އުނދަގޫ ވާކަހަލަ ކަންކަން ހުއްޓުވަނީ. ދެވަނަ ކަމަކަށް، ގާނޫނަށް ބަދަލު ގެނެސްގެން ކުއްޔަށް ދިނުން މަނާ ކަމެއްގެ ގޮތުގައި ކަނޑައެޅުން
ހައުސިން މިނިސްޓަރު ޑރ. އަބްދުالله މުއްޠަލިބު
ކަންމިހެން ހުރި ނަމަވެސް، ޚާއްސަ ޙާލަތެއްގައި ސަރުކާރުގެ ހުއްދަ ލިބިގެން އެ ފުލެޓް ކުއްޔަށް ދެވިދާނެ ކަމަށް އޭނާ ވިދާޅުވިއެވެ.
މިސާލަަކަށް، އެއް ކޮޓަރީގެ ނުވަތަ ދެ ކޮޓަރީގެ ފުލެޓެއް އޮތީ. ބޮޑު ފެމިލީއެއް އެތަނުގައި ނޫޅެވެނީ. އެ ހާލަތުގައި ސަރުކާރުން އެ ކުއްޔަށް ދިނުމަށް ހުއްދަދިނުން ކަހަލަ ކަންތައް ކުރެވިދާނެ.
ހައުސިން މިނިސްޓަރު ޑރ. އަބްދުالله މުއްޠަލިބު
އެ ނޫން ޙާލަތްތަކުގައި ކުއްޔަށް ދިނުމަކީ ސަރުކާރުން ބަލައިގަންނަ ކަމެއް ނޫން ކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
