ހުރިހާ އުމުރުފުރައަކަށް ބެލިނަމަވެސް އެންމެގިނައިން ގެއްލެނީ ފިރިހެނުންނަށް ލިބެންޖެހޭ ހައްޤުތައްކަމަށް ހިއުމަން ރައިޓްސް ކޮމިޝަނުގެ 2025 ވަނަ އަހަރުގެ އަހަރީ ރިޕޯޓްގައި ބުނެފިއެވެ.

އެޗްއާރުސީއެމުން އާއްމުކޮށްފައިވާ މިދިޔަ އަހަރުގެ އަހަރީ ރިޕޯޓްގައިވާގޮތުން މިދިޔަ އަހަރު އެންމެގިނައިން ހުށަހަޅާފައިވަނީ ފިރިހެނުންގެ ހައްޤުތައް ގެއްލިގެންނެވެ. ކޮމިޝަނުން ނެރެފައިވާ ރިޕޯޓަށް ބަލާއިރު އަންހެނުންނާ އަޅާބަލާއިރު ފިރިހެނުންގެ ހައްޤުތައް ގެއްލިގެން ރެކޯޑް މިންވަރަކަށް މައްސަލަ ހުށަހަޅާފައިވާކަން ފާހަގަކޮށްލެވެއެވެ. އެގޮތުން ހުރިހާ އުމުރުފުރައަކުންވެސް ފިރިހެނުންގެ ހައްޤުތައް ގެއްލިގެން ހުށަހަޅާފައިވާ މިންވަރު އިތުރުކަން ފާހަގަކޮށްލެވެއެވެ.

ރިޕޯޓަށް ބަލައިރު އެންމެގިނައިން ހައްޤުތައް ގެއްލިގެން ހުށަހަޅާފައިވަނީ 18 އަހަރާއި 65 އަހަރުގެ އުމުރުފުރައިންނެވެ. އެގޮތުން އެ އުމުރުފުރައިން ހައްޤު ގެއްލުނު ފިރިހެނުންގެ އަދަދު 394 ގައި އުޅޭއިރު، އެ އުމުރުފުރައިން ހައްޤު ގެއްލުނު އަންހެނުންގެ އަދަދަކީ 36 އެކެވެ. 

މައުލޫމާތު: އެޗްއާރުސީއެމްގެ 2025 ވަނަ އަހަރުގެ އަހަރީ ރިޕޯޓް

ހިއުމަން ރައިޓްސް ކޮމިޝަނުން ބުނީ އެ ކޮމިޝަނުން ބަލާ ބައެއް މައްސަލަތަކުގައި އެކަކަށްވުރެ ގިނަ މީހުންގެ ހައްޤުތައްވެސް ގެއްލިފައިހުންނަކަން ފާހަގަކޮށްލެވޭ ކަމަށެވެ. ހައްޤު ގެއްލިގެން ހުށަހަޅާފައިވާ މައްސަލަތަކަށް ބަލައިރު، އެންމެގިނަ މައްސަލަތައް ހުށަހަޅާފައިވަނީ ކ.އަތޮޅުންނެވެ. އެއަށްފަހު ދެން އެންމެގިނައިން މައްސަލަ ހުށަހަޅާފައިވަނީ މާލެ ސަރަހައްދުންނެވެ. ކ.އަތޮޅުން 232 މައްސަލަ ހުށަހަޅާފައިވާއިރު، މާލެ ސަރަހައްދުން 129 މައްސަލަ ވަނީ ހުށަހަޅާފައެވެ.

އެޗްއާރުސީއެމުން މިދިޔަ އަހަރު ރައްޔިތުން މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ވަޑައިގެން ހުށަހެޅި 2023 އަދި 2024 ވަނަ އަހަރުގެ އެންޓި-ޓޯޗަރ ރިޕޯޓުތަކުގައިވެސް ވަނީ އަހަރުން އަހަރަށް އަނިޔާ ލިބޭ ފިރިހެނުންގެ އަދަދު ހުރިހާ އުމުރު ފުރައަކުންވެސް އިތުރުވަމުން އަންނަކަން ފާހަގަކޮށްފައެވެ.

އެޗްއާރުސީއެމުން ނެރެފައިވާ 2024 ވަނަ އަހަރުގެ ރިޕޯޓަށް ބަލާއިރު، ހައްގުތައް ގެއްލިގެން އެންމެގިނައިން ރިޕޯޓްކޮށްފައިވަނީވެސް ފިރިހެނުންނެވެ. އެގޮތުން ހައްގުތައް ގެއްލިގެން 40 ރިޕޯޓް ލިބުނުއިރު، އޭގެ ތެރޭގައި ހައްގުތައް ގެއްލުނު ފިރިހެނުންގެ އަދަދު އުޅެނީ 625 ގައެވެ. އަދި ހައްގުތައް ގެއްލުނު އަންހެނުންގެ އަދަދަކީ 158 އެވެ.