އީރާނުގެ ރޫހާނީ ލީޑަރު އާޔަތުالله އަލީ ޚާމަނާއީ އަވަހާރަވުމާ ގުޅިގެން، އެމަގާމަށް އޭނާގެ ދަރިކަލުން މޮޖްތަބާ ޚާމަނާއީ އައްޔަންކޮށްފިއެވެ.

އުމުރުން 56 އަހަރުގެ މޮޖްތަބާ އަކީ އާންމުކޮށް ފެންނަ މޫނެއް ނޫނެވެ. އޭނާގެ ބައްޕާފުޅާ ހިލާފަށް، މޮޖްތަބާ އަކީ މިހާތަނަށް ސަރުކާރުގެ އެއްވެސް ސިޔާސީ މަގާމެއް ފުރުއްވާފައިވާ ބޭފުޅެއް ނޫނެވެ. އަދި އާންމުކޮށް ތަގުރީރު ކުރެއްވުމާއި އިންޓަވިއު ދެއްވުމުން ދުރުގައި ހުންނަވާ މޮޖްތަބާގެ ފޮޓޯއެއް ނުވަތަ ވީޑިއޯއެއްވެސް ފެންނަން ހުރީ ވަރަށް މަދުންނެވެ.

ނަމަވެސް، އީރާނުގެ ސިޔާސީ މަސްރަހުގެ ފަހަތުގައި އޭނާގެ ނުފޫޒު ވަރަށް ބޮޑަށް އޮންނަ ކަމުގެ އަޑުތައް ފެތުރޭތާ އަހަރުތަކެއް ވެއްޖެއެވެ. ވިކިލީކްސްއިން އާންމުކުރި އެމެރިކާގެ ޑިޕްލޮމެޓިކް ލިޔުންތަކުގައި މޮޖްތަބާ ސިފަކޮށްފައިވަނީ "ފަރުދާގެ ފަހަތުގައި ހުންނަ ބާރުގަދަ ޝަހުސިއްޔަތެއް" ގެ ގޮތުގައެވެ. އޭޕީ ނިއުސް އެޖެންސީން ބުނާގޮތުގައި އޭނާއަކީ ގާބިލު އަދި ނިންމުންތައް ނިންމުމުގައި ހަރުދަނާ ބޭފުޅެކެވެ.

މޮޖްތަބާ އިސްކުރުމަކީ އީރާނުގައި ބޮޑު ބަހުސަކަށް ވެގެންދާނެ ކަމެއް ކަމަށް ބެލެވެއެވެ. ސަބަބަކީ 1979 ވަނަ އަހަރު އީރާނުގެ އިންގިލާބަށްފަހު ރަސްކަން އުވާލައި، ގައުމުގެ އެންމެ މަތީ ވެރިޔަކީ އާއިލީ ވާރުތައިން އަންނަ މީހެއްގެ ބަދަލުގައި، ދީނީ އިލްމާއި ގާބިލުކަމަށް ބަލައި ހޮވާ ބޭފުޅަކަށް ވާންޖެހޭނެ ކަމަށް ކަނޑައަޅާފައި އޮތުމެވެ. މީގެ ކުރިން އާޔަތުالله އަލީ ޚާމަނާއީވެސް ވަނީ އޭނާގެ ދަރިކަލުން އެ މަގާމަށް އައުމަށް ދެކޮޅު ހައްދަވާފައިވާ ކަމަށް "އެސެމްބްލީ އޮފް އެކްސްޕާޓްސް" ގެ މެންބަރަކު ވިދާޅުވެފައެވެ.

މޮޖްތަބާ އުފަންވީ 8 ސެޕްޓެމްބަރު 1969 ގައި މަޝްހަދުގައެވެ. އޭނާއަކީ އަލީ ޚާމަނާއީގެ ހަ ދަރިކަލުންގެ ތެރެއިން ދެވަނަ ދަރިކަލުންނެވެ. އުމުރުން 17 އަހަރުގައި އީރާން-އިރާގު ހަނގުރާމައިގައި އަމަލީގޮތުން ބައިވެރިވެވަޑައިގެންފައިވާ މޮޖްތަބާ، ދީނީ ތައުލީމު ހާސިލުކުރުމަށް ގޯމް އަށް ވަޑައިގެންނެވީ 1999 ވަނަ އަހަރުއެވެ. އޭނާ އީރާނު މީހުން ބުނާ ”ދީނީ ހެދުން“ (ކްލެރިކަލް ކްލޯތިންގް) ތުރުކުރައްވަން ފެއްޓެވީ އުމުރުން 30 އަހަރުގައެވެ.

މޮޖްތަބާ އަކީ މިހާރުވެސް މެދުފަންތީގެ ދީނީ އިލްމުވެރިއެކެވެ. އެހެންކަމުން، ރޫހާނީ ލީޑަރުގެ މަގާމަށް އޭނާ އައުމުގައި ދީނީ އިލްމީ ފެންވަރުގެ ގޮތުން ގޮންޖެހުންތަކެއް ކުރިމަތިވުމަކީ އެކަށީގެންވާ ކަމެކެވެ.