މާލޭ ނޯތު ހާބަރު ބޭނުންކުރާ އުޅަނދުތަކުން، ނަގާ ފީ ބޮޑުކުރުމާއި ގުޅޭ އެއްވެސް މަޝްވަރާއެއް ސަރުކާރާއެކު ކުރަމުން ނުގެންދާ ކަމަށް އެމްޕީއެލް އިން ބުނެފި އެވެ.
އެ ކުންފުނިން މިހެން ބުނީ ނޯތު ހާބަރު ބޭނުންކުރާ އުޅަނދުތަކުން، ނަގާ ފީ ބޮޑުކުރުމާއި ގުޅޭ ބަޔަކު ވާހަކަތަކެއް ފަތުރަމުންދާތީ އެވެ. އިދިކޮޅު ޕާޓީގެ ބައެއް ބޭފުޅުން ވެސް އެފަދަ ވާހަކަތައް އެބަ ދައްކަ އެވެ.
އެމްޕީއެލް އިން ބުނީ އުޅަނދުތަކުން، ނަގާ ފީ ބޮޑުކުރުމާއި ގުޅޭގޮތުން ދެކެވޭ ވާހަކަތަކީ އެއްވެސް އަސާސެއް ނެތް ހަގީގަތާއި ހިލާފު ވާހަކަތަކެއް ކަަމަށެވެ.
އެ ކުންފުނިން ބުނީ ބޮޑުތަކުރުފާނު މަގު ތަރައްގީ ކުރުމުގެ މަޝްރޫޢުއާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މާލެ ނޯތު ހާބަރުގެ ހިދުމަތްތައް ފުޅާކޮށް "އޭ ޒޯން" ބޭނުންކުރާ އުޅަނދު ފަހަރަށް ފެނާއި ކަރަންޓުގެ ހިދުމަތްވެސް ފޯރުކޮށް ދިނުމަށް އަންގަވާފައި ކަމަށާ އެ ކުންފުނިން ދަނީ އެ ހިދުމަތް ފެށުމަށް ކުރަން ޖެހޭ މަސައްކަތް ކުރަމުން ކަމަށެވެ.
އެމްޕީއެލްގެ އަމާޒަކީ މާލެ ނޯތު ހާބަރު ބޭނުންކުރާ އޮޑިދޯނި ފަހަރަށް ވީހާވެސް ލުއި ފަސޭހަ ގޮތަކަށް ހިދުމަތް ފޯރުކޮށްދިނުން ކަމަށާ އެގޮތުން އުޅަނދުތަކަށް ޖާގަ ދިނުމުގައި އަމަލު ކުރަމުންދާ އުސޫލަށް މި މަހު ބަދަލު ގެނެސް މުދާ އުފުލާ ބޯޓް ފަހަރުތަކުން ކިއުގައި މަޑުކުރަން ޖެހޭ ވަގުތު ކުޑަވެ ހިދުމަތް ހޯދުމުގައި އިތުރު ފަސޭހަތައް ލިބޭނެ ގޮތް ހަމަޖައްސާފައިވާ ކަމަށެވެ.
މީގެ އިތުރުން މަސްވެރިކަން ކުރާ އޮޑިދޯނި ފަހަރަށް ޚާއްސަކޮށް މާލެ ނޯތު ހާބަރުގެ "ޑީ ޒޯން" އާއި "އީ ޒޯން" އަދި "އެފް ޒޯން" ބޭނުންކުރާ އެއްވެސް އުޅަނދަކުން މިހާރުވެސް ފީއެއް ނުނަގާ ކަމަށް އެމްޕީއެލުން ވަނީ ބުނެފަ އެވެ.
އެ ކުންފުނިން ވަނީ އާންމުންގެ ގިނަ ބައެއްގެ މަސްލަހަތާއި ގުޅިފައިވާ މިފަދަ ކަންކަމުގައި ނުތަަނަވަސްކަން އުފެދޭ ގޮތަށް ދޮގު ވާހަކަތައް ފެތުރުމަކީ ވަރަށް ހިތާމަހުރި ކަމެއްކަން ފާހަގަ ކުރައްވާ އެފަދަ ކަންކަން ނުކުރުމަށް އިލްތިމާސް ކޮށްފަ އެވެ.
Advertisement
This content is created and paid for by advertisers and does not involve Voice Journalists
