ނިރުބަވެރި އިސްރާއީލުން އީރާނުގެ ސުޕްރީމް ނެޝަނަލް ސެކިއުރިޓީ ކައުންސިލްގެ ސެކްރެޓަރީ ޢަލީ ލަރީޖާނީ ވައިގެ ޙަމަލާއެއްގައި އަވަހާރަކޮށްލުމާ ގުޅިގެން އީރާނުން އިސްރާއީލާއި އެމެރިކާގެ ބޭސްތަކަށް ވަރުގަދަ ރައްދު ޙަމަލާތަކެއް ދީފިއެވެ.

އީރާނުގެ ސެކިއުރިޓީ އެންމެ އިސް އޮފިޝަލް ޢަލީ ލަރީޖާނީ އާއި ބަސީޖް މިލީޝިޔާގެ ކޮމާންޑަރު ޣުލާމް ރިޟާ ސުލައިމާނީ އަވަހާރަކޮށްލާފައިވާ ކަން އީރާނުގެ ދައުލަތުގެ މީޑިއާ އިން ވަނީ ކަށަވަރުކޮށްދީފައެވެ. ސެކިއުރިޓީ ކައުންސިލުން ނެރުނު ބަޔާނުގައި ބުނެފައި ވަނީ ލަރީޖާނީ އަވަހާރަވީ އޭނާގެ ދަރިފުޅު މުރުތަޟާ ލަރީޖާނީ އާ އެކުގައި ކަމަށެވެ. އެ ޙަމަލާގައި ލަރީޖާނީގެ އޮފީހުގެ ވެރިޔާ ޢަލީރިޟާ ބަޔާތު އާއި ގިނަ ބޮޑީގާޑުން ވެސް ވަނީ މަރުވެފައެވެ.

ލަރީޖާނީ އަކީ ފެބްރުއަރީ 28 ގައި ހަނގުރާމައިގެ ފުރަތަމަ ދުވަހު އީރާނުގެ ކުރީގެ ރޫޙީ ލީޑަރު އާޔަތުالله ޢަލީ ޚާމަނައީ މަރާލި ފަހުން، އެމެރިކާ-އިސްރާއީލު ޙަމަލާތަކުގައި މަރާލެވުނު އީރާނުގެ އެންމެ މަތީ ފަންތީގެ އޮފިޝަލެވެ. އޭނާ އަކީ އެތައް އަހަރެއް ވަންދެން އީރާނުގެ ސިޔާސީ މައިދާނުގައި މުހިންމު ދައުރެއް އަދާކުރި ބޭފުޅެކެވެ. ހުޅަނގާ އެކު ނިއުކްލިއާ މަޝްވަރާތައް ވެސް ލީޑުކޮށް، ކުރިން އީރާނުގެ ޕާލަމެންޓުގެ ރައީސްކަން ވެސް ކޮށްފައިވެއެވެ.

ލަރީޖާނީ މަރާލުމުގެ ބަދަލު ހިފާނެ ކަމަށް އީރާނުން ވަޢުދުވެ، އައިއާރުޖީސީގެ އެއެރޯސްޕޭސް ފޯސްގެ ކޮމާންޑަރު ސަރުދާރު މޫސަވީ ވަނީ "އަވަސް ޙަމަލާ" އެއް އިޢުލާނުކޮށް، ލަރީޖާނީ މެރުމުގެ "ބަދަލެއް"ގެ ގޮތުގައި އިސްރާއީލަށް "ވަރުގަދަ" ޙަމަލާތަކެއް ދީފައެވެ.

އައިއާރުޖީސީ އިން ބުނި ގޮތުގައި އެ ޖަމާޢަތުގެ މިސައިލްތައް ވަނީ އިސްރާއީލުގެ ބިމުގައި 100 އަށް ވުރެ ގިނަ އަސްކަރީ އަދި ސެކިއުރިޓީ ޓާގެޓަށް އަރާފައެވެ. ޓެލް އަވީވް އާއި މެދުތެރޭ އިސްރާއީލުގެ ސަރަޙައްދުތަކަށް ޑްރޯން އާއި މިސައިލް ޙަމަލާ ދީ، ޓެލް އަވީވް ކައިރީގައި ދެ މީހަކު ވަނީ މަރުވެފައެވެ.

އީރާނުގެ އެއްގަމު ސިފައިންގެ ކޮމާންޑަރު އިން ޗީފް މޭޖާ ޖެނެރަލް ޢަމީރު ޙާތަމީ ބުނީ ލަރީޖާނީގެ މަރަށް އީރާނުގެ ރައްދު ވާނީ "ނިންމާ ރައްދަކަށް" ކަމަށާއި، "އޭނާގެ ލޭގެ ބަދަލު ހިފާނެ" ކަމަށެވެ. ޚަތަމުލް އަންބިޔާ މައި މަރުކަޒުގެ ކޮމާންޑަރު މޭޖާ ޖެނެރަލް ޢަލީ ޢަބްދުالله ވަނީ އެމެރިކާގެ ރައީސް ޓްރަމްޕް "އީރާނުގެ ސަޕްރައިޒްތަކަށް އިންތިޒާރުކުރާން"އަންގާފައެވެ. 

އީރާނުގެ ޚާރިޖީ ވަޒީރު ޢައްބާސް ޢަރާޣްޗީ އަލް ޖަޒީރާ އަށް ދެއްވި ބަސްދީގަތުމެއްގައި ވިދާޅުވީ ލަރީޖާނީ އަވަހާރަކޮށްލުމަކީ އީރާނުގެ ލީޑަޝިޕް ނެތިދާ ވަރުގެ ބޮޑު ގެއްލުމެއް ލިބޭނެ ކަމެއް ނޫން ކަމަށާ، އީރާނުގެ ސަރުކާރު އެންމެ ފަރުދެއްގެ މައްޗަށް ބިނާވެފައި ނުވާ ކަން އެމެރިކާ އާއި އިސްރާއީލަށް އަދިވެސް ނުވިސްނޭ ކަމަށެވެ.

މި ހަނގުރާމައިގެ ސަބަބުން ތެލުގެ އަގު ބޮޑުތަނުން އުފުލި، ހޮރްމޫޒް ކަނޑުއޮޅީގެ ޝިޕިން ހުއްޓި، ސަރަޙައްދުގެ އެތައް މިލިއަން ޢާންމުން ވަނީ ގެދޮރު ދޫކޮށް ގޮސްފައެވެ. ފެބްރުއަރީ 28 އިން ފެށިގެން އެމެރިކާ-އިސްރާއީލުގެ ޙަމަލާތަކުގައި އީރާނުން މަދުވެގެން 1،444 މީހުން މަރުވެ، 18،551 މީހުން ޒަޚަމްވެފައިވާ ކަމަށް ރިޕޯޓުތައް ބުނެއެވެ.