އިންޑިއާ ކަނޑުގައި އޮންނަ އެމެރިކާ އާއި އިނގިރޭސިވިލާތުގެ ގުޅިފައިވާ އަސްކަރީ މަރުކަޒެއް ކަމަށްވާ ޑިއޭގޯ ގާސިއާ އަށް އަމާޒުކޮށް އީރާނުން ދެ ބެލިސްޓިކް މިސައިލް އިއްޔެ ފޮނުވާލައިފިއެވެ.

ވޯލް ސްޓްރީޓް ޖާނަލްގައި ބުނެފައިވަނީ، ޗާގޯސް އާކިޕެލަގޯގައި އޮންނަ މި ކުޑަ ރަށަށް ދިން ހަމަލާތައް އެ ރަށަށް އަރާފައެއް ނުވެއެވެ. މީގެ ތެރެއިން އެއް މިސައިލް ފެއިލްވެފައިވާއިރު، ދެވަނަ މިސައިލް ހުއްޓުވުމަށް އެމެރިކާގެ އަސްކަރީ މަނަވަރަކުން އެސްއެމް-3 އިންޓަރސެޕްޓަރެއް ފޮނުވާލި ކަމަށް ރިޕޯޓްތައް ބުނެއެވެ. ނަމަވެސް، ދެވަނަ މިސައިލް ފެއިލްވީ މި އިންޓަރސެޕްޓަރުގެ ސަބަބުން ކަމެއް އަދި ސާފެއް ނުވެއެވެ.

މިހަމަލާ ދޭން މަސައްކަތްކޮށްފައި މިވަނީ ހަނގުރާމައިގައި ފޯޅަވަހި ބޭނުންކުރުމުގެ ހުއްދަ އިނގިރޭސިވިލާތުން ދީފައި ވަނިކޮށެވެ. އަދި މި ހުއްދަ ދިނީ މާބޮޑަށް ލަސްވި ފަހުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފައި ވަނިކޮށެވެ.

1970 ގެ އަހަރުތަކުން ފެށިގެން އެމެރިކާ އާއި އިނގިރޭސިވިލާތުން ޑިއޭގޯ ގާސިއާގައި އަސްކަރީ ހަރަކާތްތައް ހިންގަމުންދަނީ އެ ރަށުގެ އަސްލު ވަޒަންވެރިން ކަމަށްވާ ޗާގޯސް ރައްޔިތުން ގަދަކަމުން ބޭރުކުރުމަށްފަހުގައެވެ.

އީރާނުން ޗާގޯސްއަށް ދިން މި ހަމަލާއަކީ މީގެ ތިން ހަފުތާ ކުރިން ހަނގުރާމަ ފެށުނު ފަހުން އީރާނުން އެންމެ ދުރަށް ދިން މިސައިލް ހަމަލާއެވެ. އީރާނުގެ ފޮރިން މިނިސްޓަރު އައްބާސް އަރަގްޗީ މީގެ ކުރިން ވިދާޅުވެފައިވަނީ އީރާނުގެ މިސައިލްތަކުގެ ރޭންޖަކީ 2,000 ކިލޯމީޓަރު ކަމަށެވެ. ނަމަވެސް ޑިއޭގޯ ގާސިއާ އޮންނަނީ އީރާނާ ގާތްގަނޑަކަށް 4,000 ކިލޯމީޓަރު ދުރުގައެވެ.

އަރަގްޗީ 'އެކްސް' ގައި ކުރެއްވި ޕޯސްޓެއްގައި ވިދާޅުވީ، އިނގިރޭސި ރައްޔިތުންގެ ގިނަ ބަޔަކު އިސްރާއީލާއި އެމެރިކާއިން އީރާނާ ދެކޮޅަށް ކުރާ ހަނގުރާމައިގައި ބައިވެރިވާން ބޭނުންނުވާ ކަމަށެވެ. އަދި ބޮޑުވަޒީރު ސްޓާމަރ، އަމިއްލަ ރައްޔިތުންގެ އިހުސާސްތަކަށް ބެލުމެއްނެތި އިނގިރޭސި މަރުކަޒުތައް ބޭނުންކުރުމުގެ ހުއްދަ ދިނުމަކީ އިނގިރޭސިންގެ ފުރާނަ ނުރައްކަލަށް ހުށަހެޅުން ކަމަށާއި، އީރާނުން އަމިއްލަ ދިފާއުގައި މަސައްކަތް ކުރާނެ ކަމަށްވެސް އޭނާ ވިދާޅުވިއެވެ.