އަތޮޅުތަކުގައި ޕަބްލިކް ވާކްސް ޔުނިޓްތައް އަލަށް ގާއިމު ކުރާ ރަށްތަކާއި، އެ ތަންތަން ގާއިމުކުރުމަށް ކުރަމުންދާ މަސައްކަތްކުގެ ތަފްސީލް މިނިސްޓާ އޮފް ސިޓީސް، ލޯކަލް ކައުންސިލް އެންޑް ޕަބްލިކް ވާކްސް އާދަމް ޝަރީފް އުމަރު ހިއްސާ ކުރައްވައިފި އެވެ. 

ނޫސްވެރިންނަށް މައުލޫމާތު ދެއްވުމަށް ރައީސް އޮފީހުގައި މިއަދު ބޭއްވި ބައްދަލުވުމެއްގައި މިނިސްޓަރު ވިދާޅުވީ 19 އަތޮޅެއްގައި ޕަބްލިކް ވާކްސް ޔުނިޓްތައް އަލަށް ގާއިމްކުރަން ނިންމާފައިވާ ކަމަށެވެ. އެގޮތުން 19 ރީޖަނަލް ޔުނިޓަށާއި މޮބައިލް ހަތަރު ޔުނިޓަށް ބޭނުންވާ މެޝިނަރީޒާއި، އިކްއިޕްމަންޓް ހޯދުމަށް 9،130،173.36 ޑޮލަރު ހަރަދުވާނެ ކަމަށް މިނިސްޓަރު ވިދާޅުވި އެވެ.

ޕަބްލިކް ވާކްސް ޔުނިޓުތައް ގާއިމްކުރާ ރަށްތަކަކީ ހއ. ދިއްދޫ އާއި ށ. ފުނަދޫ އާއި ށ. މިލަންދޫ އާއި ނ. މަނަދޫ އާއި ރ. މާކުރަތާއި ބ. އޭދަފުއްޓާއި ޅ. ނައިފަރާއި ކ. ތުލުސްދޫ އާއި އއ. ރަސްދޫ އާއި އދ. މަހިބަދޫ އާއި އދ. މާމިގިއްޔާއި ވ. ފެލިދޫ އާއި މ. މުއްޔާއި ފ. ނިލަންދޫ އާއި ދ. ކުޑަހުވަދޫ އާއި ތ. ވޭމަންޑޫ އާއި ތ. ވިލުފުއްޓާއި ލ. ގަން އަދި ގއ. ވިލިނގިލީގަ އެވެ.

މިނިސްޓަރު ވިދާޅުވީ މި ޔުނިޓްތަކަށް 456 މުވައްޒަފަކު ނަގާނެ ކަމަށެވެ. މޯބައިލް ޔުނިޓްތަކަށް 60 މުވައްޒަފުން ނަގާނެ ކަމަށެވެ. މިހާތަނަށް މިނިސްޓްރީ އޮފް ފިނޭންސް އެންޑް ޕްލޭނިންއިން އެޕްރޫވަލްކޮށްފައި ވަނީ 141 މަގާމެވެ. 

ފިނޭންސް އިން އެޕްރޫވް ވެފައިވާ ރަށްތަކާއި މަގާމުތައް:

* ހއ. ދިއްދޫ ޕަބްލިކް ވާކްސް ޔުނިޓަށް 24 މަގާމު

* ނ. މަނަދޫ ޕަބްލިކް ވާކްސް ޔުނިޓަށް 24 މަގާމު

* އދ. މަހިބަދޫ ޕަބްލިކް ވާކްސް ޔުނިޓަށް 22 މަގާމު

* ވ. ފެލިދޫ ޕަބްލިކް ވާކްސް ޔުނިޓަށް 24 މަގާމު

* ތ. ވޭމަންޑޫ ޕަބްލިކް ވާކްސް ޔުނިޓަށް 23 މަގާމު

* ގއ. ވިލިނގިލި ޕަބްލިކް ވާކްސް ޔުނިޓަށް 24 މަގާމު

މިނިސްޓަރު ވިދާޅުވީ، އޮފީސް އިމާރާތާއި، ގަރާޖުފަދަ ތަންތަން ހެދުމަށް ބޭނުންވާ ބަޖެޓާއެކު ފިނޭންސަށް މިހާރު ހުށަޅާފައިވާ ކަމަށެވެ.