ބިދޭސީންވެސް އިސްތިސްނާ ނުވާގޮތަށް ހުރިހާ އެންމެނަށް އުނގުލަށް ދެވޭގޮތަށް ރ.އުނގޫފާރު ކައުންސިލުން ކުރިން ނިންމި ނިންމުން ބަދަލުކޮށްފިއެވެ.

އުގުލަށް އެރުމާ ގުޅޭގޮތުން އުނގޫފާރު ކައުންސިލުން މީގެ ކުރިން ކުރި އާއްމު އިއުލާނުގައި ބުނެފައިވަނީ، އުނގުލަށް އެރޭނީ ހަމައެކަނި އުނގޫފާރަށް ނިސްބަތްވާ މީހުންނަށް އެކަނި ކަމަށެވެ. އުނގޫފާރު ކައުންސިލުން އެގޮތަށް ނިންމުމާ ގުޅިގެން ގިނަ އަދަދެއްގެ ރައްޔިތުންވަނީ އެ ނިންމުމަށް ވަރަށްބޮޑަށް ފާޑުކިޔާފައެވެ. އެއާއެކު ސިޓީތަކާ އިދާރީ ދާއިރާތައް ހިންގުމާ ބެހޭ ވަޒީރު އާދަމް ޝަރީފް ވަނީ ރައްޔިތުން އެދޭގޮތަށް ނިންމުން ބަދަލުކޮށްދިނުމަށް އުނގޫފާރު ކައުންސިލްގެ ކިބައިން އެދިވަޑައިގަންނަވާފައެވެ.

އުނގޫފާރު ކައުންސިލުން އިއްޔެ ގެޒެޓްގައި އާއްމުކުރި އިއުލާނުގައި ބުނެފައިވަނީ ކައުންސިލުން އުނގުލާމެދު އަމަލުކުރާނެ ވަކި އުސޫލެއް ކަނޑައަޅާ ނިމެންދެން، ކޮންމެ ހޮނިހިރު ދުވަހެއްގެ ހެނދުނު 7:30 ން ހަވީރު 05:00 އާ ދެމެދުގެ ވަގުތުތަކަށް އުނގުލަށް އެރޭނޭކަމަށެވެ. އުނގުލަށް އަރަން ބޭނުންނަމަ ގޫގުލް ފޯމަކުން އެކަން އަންގަން ޖެހެއެވެ.

އަދި ރަށަށް އެރުމަށްފަހު ކުރީ އިއުލާނުގައިވެސް ފާހަގަކޮށްފައިވާ ކަންކަމަށް އަމަލުކުރުމަށް އުނގޫފާރު ކައުންސިލުން ވަނީ އެދިފައެވެ.

އެގޮތުން ކާށި ހޮވައިފިނަމަ ހޮވާ ކޮންމެ 04 ކާށިން 01 ކާށި ކައުންސިލަށް ދޭންޖެހެއެވެ. އަދި ގެނެވޭނީ ހަމައެކަނި ހޮވާ ކާްއްޓެވެ. ހޮވާ ކާށީގެ ތެރެއިން ކައުންސިލަށް ލިބޭ ކާށި ވިއްކުމަށް ނިންމާފައިވާއިރު، އުނގުލުން ގަންނަ ނަމަ ކާއްޓެއް 5 ރުފިޔާ އަށެވެ. އުނގޫފާރުންނަމަ 7 ރުފިޔާ އަށެވެ. ކާށި ހޮވަން ހުއްދަ އޮތްނަމަވެސް ރުއް ގަހަށް އެރުމާއި ދިގު ދަނޑި ބޭނުން ކޮށްގެން ރުއް އެޅުން މަނައެވެ.

އުނގުލުން ކަށިކެޔޮގަނޑެއް 100 ރުފިޔާއަށް ގަނެގެން ގެންދެވޭއިރު، ކުއްޅަވައް، ފަން، މިދިލިއޮށް ހޮވާ ފަރާތަކަށް އެތަކެތި އަގަކާ ނުލައި ލިބޭނޭކަމަށް ކައުންސިލުން ބުނެއެވެ. އުނގުލުން ރުއްގަސް ކެނޑުން މަނާކޮށްފައިވާއިރު، އުނގޫފާރު ކައުންސިލްގެ ހުއްދަނެތި އެރަށަށް އަރައިގެން ނުވާނޭކަމަށް ކައުންސިލުން ވަނީ ބުނެފައެވެ.

އުނގުލަކީ ކުރިން މީހުން ދިރިއުޅުނު ރަށެއް ނަމަވެސް، ރައީސް މައުމޫން ވެރިކަމުގައި 1990 ވަނަ އަހަރުގެ ކުރީކޮޅު އެރަށު މީހުން ވަނީ ހުޅުދުއްފާރަށް ބަދަލުކޮށްފައެވެ.