މާލެ ސަރަހައްދުގެ އާބާދީ އިތުރުވަމުންދާ މިންވަރަށް ބަލައި، ފެނުގެ ޚިދުމަތް އިތުރަށް ހަރުދަނާކުރުމަށްޓަކައި 10 އަހަރުގެ ދުވަހުގެ މާސްޓަރ ޕްލޭނެއް އެކުލަވާލުމުގެ މަސައްކަތް އެމްޑަބްލިޔުއެސްސީ އިން ފަށައިފިއެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަދައްކަވަމުން އެމްޑަބްލިޔުއެސްސީގެ މެނޭޖިންގ ޑިރެކްޓަރު ޢަބްދުލް މަތީން މުޙައްމަދު ވިދާޅުވީ، ރާއްޖޭގެ ގިނަ ރަށްރަށުގައި އަދިވެސް ޒަމާނީ ފެނުގެ ނިޒާމުތައް ގާއިމުކުރުމުގެ މަސައްކަތް ކުރިއަށްދާ ކަމަށެވެ. މާލެ ސަރަހައްދުގައި އެ ކުންފުނިން ޚިދުމަތް ދޭތާ 30 އަހަރު ވެފައިވާއިރު، މިހާރުގެ ހާލަތަށް ބަލައި ނިޒާމަށް ބޮޑެތި ބަދަލުތަކެއް ގެންނަންޖެހިފައިވާކަން އޭނާ ފާހަގަކުރެއްވިއެވެ.
މަތީން ވިދާޅުވި ގޮތުގައި، މާލެއަށް އާބާދީ ތޮއްޖެހި، ގުޅިފަޅާއި ގިރާވަރުފަޅު ފަދަ ތަންތަން ތަރައްގީވަމުންދާއިރު، ޚިދުމަތް ދޭން އޮތް ގޮތަށް ބަދަލުތަކެއް އަންނަންޖެހެއެވެ.
"އަޅުގަނޑުމެން މި ބޭނުންވާ އިންފްރާސްޓްރަކްޗާ ގާއިމްކުރުމަށް ކުރާ މަސައްކަތުގެ އިތުރަށް، ފެނާއި ނަރުދަމާގެ ޚިދުމަތާ ގުޅޭ މާސްޓަރ ޕްލޭނެއް އެކުލަވާލުމުގެ މަސައްކަތް މިހާރު މިދަނީ ކުރަމުން،" މަތީން ވިދާޅުވިއެވެ.
މި މާސްޓަރ ޕްލޭންގެ ސަބަބުން ދައުލަތުގެ އެކި މުއައްސަސާތަކާ ގުޅިގެން މަސައްކަތް ކުރަން ފަސޭހަވާނެ ކަމަށާއި، ޚާއްޞަކޮށް ބިން ހޯދުމުގައި ދިމާވާ ގޮންޖެހުންތަކަށް ހައްލެއް ލިބޭނެ ކަމަށް އެމްޑީ ވިދާޅުވިއެވެ. އަދި ފެން ރައްކާކުރާ ތާނގީތަކާއި، ބޯހޯލް ތޮރުފުމާއި، ޕަންޕިންގް ސްޓޭޝަންތައް ފަދަ ވަސީލަތްތައް ގާއިމުކުރުމަށް ބޭނުންވާ ޖާގަ، ރަށްރަށުގެ ލޭންޑް ޔޫސް ޕްލޭންތަކުގައި ހިމެނުމަށް މި ޕްލޭންގެ ސަބަބުން މަގުފަހިވާނެ ކަމަށްވެސް ވިދާޅުވިއެވެ.
މީގެ އިތުރުން، މިއީ ބޮޑު އިންވެސްޓްމަންޓަކަށް ވާތީ، ދުރާލާ ޕްލޭން ކުރެވިފައި އޮތުމުން ބަޖެޓުންނާއި އެހެނިހެން ގޮތްގޮތުން ފައިސާ ހޯދަން ފަސޭހަވާނެ ކަމަށްވެސް އޭނާ ވިދާޅުވިއެވެ. މަތީން ވިދާޅުވި ގޮތުގައި، މި އޭޕްރީލް މަހުގެ ތެރޭގައި މި މާސްޓަރ ޕްލޭންގެ ޑްރާފްޓް ތައްޔާރުކޮށް ނިންމާލެވޭނެއެވެ.
ފެނުގެ ރައްކާތެރިކަން ކަށަވަރުކުރުމަށާއި، ފެން އުފެއްދުމާއި ރައްކާކުރުމުގެ ގާބިލުކަން އިތުރުކުރުމަށް، ކާރިސާއެއް ދިމާވެއްޖެ ހާލަތެއްގައި ބޭނުންކުރުމަށް މާލެއާއި ހުޅުމާލެއާ ދެމެދު އަޅާފައިވާ ހޮޅި މެދުވެރިކޮށް ދުވާލަކު 2،000 ޓަނުގެ ފެން ފޯރުކޮށްދެވޭނެ އިންތިޒާމު މިހާރު ވަނީ ހަމަޖެހިފައ. މި ނިޒާމުގެ ޖުމްލަ ކެޕޭސިޓީއަކީ 8،000 ޓަނެވެ.
Advertisement
This content is created and paid for by advertisers and does not involve Voice Journalists
