ގެސްޓްހައުސް ވިޔަފާރި ފުޅާވަމުން އަންނަ ބ.އަތޮޅު ގޮއިދޫގައި އެންމެ އުސްކޮށް އުމާރާތް ކުރެވޭނެ މިންގަނޑު އެ ރަށުގެ ކައުންސިލުން ކަނޑައަޅައިފިއެވެ. 

ގޮއިދޫ ކައުންސިލުން ނިންމާފައިވާ މި ނިންމުމުގައިވާގޮތުން އަތިރިމަތީ ސަރަހައްދުގައި ހުންނަ ގެތަށް އެންމެ އުސްވެގެން ނެގޭނީ. 42 ފޫޓަށް ނުވަތަ 4 ބުރިއަށެވެ. ރަށުތެރޭގެ އިމާރާތްތައް ނެގޭނޭކަމަށް ނިންމާފައިވަނީ 62 ފޫޓަށް ނުވަތަ 6 ބުރިއަށެވެ. އިމާރާތުގެ ފުރާޅުގެ ބަދަލުގައި ޝީޓް ނުވަތަ ޑެކް އަޅާނަމަ، ސިޑިގޮޅި 9 ފޫޓަށްވުރެ އުސް ނުވާނޭގޮތަށް އިމާރާތްކުރުން އެ މިންގަނޑުން އިސްތިސްނާ ވާނޭކަމަށް ގޮއިދޫ ކައުންސިލުން ބުނެއެވެ.

މިގޮތަށް ނިންމީ މިނިސްޓްރީ އޮފް ޕްލޭނިންގ އެންޑް އިންފްރާސްޓަކްޗާގެ ޕްލޭނިން ގަވާއިދެއްނެތް ރަށްރަށުގައި އިމާރާތްކުރަންވީ ގަވާއިދުގެ ދަށުންނެވެ. ގޮއިދާ ކައުންސިލުން މިގޮތަށް ނިންމާފައިވަނީ، އިއްޔެ ބޭއްވި ކައުންސިލްގެ 249 ވަނަ ޖަލްސާގައި ބައިވެރިވި ތިން މެމްބަރުންގެ އިއްތިފާގުންނެވެ.

ގޮއިދޫއަކީ ބ.އަތޮޅުގައި މިހާރު އެންމެ ބާރަށް ފަތުރުވެރިކަމުގެ ވިޔަފާރި ފުޅާވަމުން އަންނަ ރަށެވެ. ގޮއިދޫގައި އިމާރާތްކުރަމުން އަންނަ ގެސްޓްހައުސްތަކުގެ އަދަދު އިތުރުވަމުން އަންނައިރު، ގޮއިދޫއަކީ ބ އަތޮޅުގައި ގެސްޓްހައުސް އެޅުމަށް އެންމެ މަގްބޫލް އެއް ރަށެވެ.