މި ސަރުކާރުގެ އަމަލުތައް މިހާރު ހުރީ، ރައްޔިތުން ސަރުކާރުގެ ވަޒީފާތަކަށް ވައްދައި ބިރުދައްކައި އަޅުވެރިކުރަންކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.
ފުވައްމުލަކްގައި މިރޭ ބޭއްވި, ފުވައްމުލައް ސިޓީ"ހޭވައްލާ ތައްޔާރު" ޖަލްސާގައި، ފައްޔާޒް ވިދާޅުވީ، އެސްއޯއީތަކަށް މީހުންވައްދައި ސަރުކާރުން ރައްޔިތުންނާ ޤައުމު ހަލާކުގެ ތެރެއަށް ވައްޓާލައިފިކަމަށެވެ.
ފައްޔާޒް ވިދާޅުވީ، ފެނިގެން މިދަނީ ދިވެހި ރައްޔިތުންގެ އުފެއްދުންތެރިކަން ނައްތާލުމަށް ސަރުކާރުން މަސައްކަތްކުރަމުންގެންދާ މަންޒަރުކަމަށެވެ. އެގޮތުން ކެޔޮޅަކު ހުރެއްޖެ ނަމަ ފެނަކައަށް ގެންގޮސް ވަޒީފާދޭކަމަށާއި، ފެނިގެން މިދަނީ ދިވެހި ރައްޔިތުން މަސްވެރިކަން ކުރުން ހުއްޓުވާލަން މިސަރުކާރުން މަސައްކަތްކުރަމުން ގެންދާތަން ކަމަށް ފައްޔާޒު ވިދާޅުވިއެވެ.
ފައްޔާޒް ވިދާޅުވީ ސަރުކާރުން ގެންދަނީ އަމިއްލަ މަސައްކަތްކުރާ ފަރާތްތަކުގެ އާމްދަނީ ހަލާކުކޮށްލުމަށް މަސައްކަތްކުރަމުންގެންދާ ތަންކަަށެވެ.
ކުޑަ، މެދުފަންތީގެ ވިޔަފާރިއެއް އޮތިއްޔާ އެދަނީ ފުނޑުފުނޑު ކޮށްލަމުން. ރައީސް މުޢިއްޒުގެ ހަމައެކަނި އިޤްތިޞާދީ ސިޔާސަތަކީ، ހަމައެކަނި އިޤްތިޞާދީ ސިޔާސަތަކީ އިޤްތިޞާދު ހަލާކު ކޮށްލާ ދިވެހި ރައްޔިތުން އެންމެންނަށް ވަޒީފާ ދިނުން
ފައްޔާޒް އިސްމާއީލް
ފައްޔާޒް ވިދާޅުވީ ސަރުކާރުން މަސައްކަތްކުރަމުންދަނީ އެތައް ޒަމާނަކުން ހޯދި ސިޔާސީ ހައްގުތަކާއި މިނިވަންކަމާ ގުޅުންހުރި ހައްގުތައް ހަނިކުރަމުން ކަމަށެވެ. އެމްޑީޕީ ސަރުކާރު ވެރިކަމަށް އައިސް، އާންމު ދިވެހި ރައްޔިތު މީހާއަކީ ފުދުންތެރި މީހަކަށް ހެދުމުގެ މަސައްކަތް ކުރިނަމަވެސް މި ސަރުކާރުން އަމަލުކުރަމުންދަނީ ދިމާ އިދިކޮޅަށްކަން ފައްޔާޒް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
