ގއ. ވިލިނގިލީގައި ހުންނަ ގއ. އަތޮޅު ތަޢުލީމީ މަރުކަޒުގައި ރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން، އެ ސްކޫލުގެ ކިޔެވުން މެދުނުކެނޑި ކުރިއަށްގެންދިއުމަށް ބޭނުންވާ އިންތިޒާމުތައް ހަމަޖައްސަމުންދާކަމަށް ތައުލީމީ ވަޒީރު ޑރ. އިސްމާޢިލް ޝަފީޢު ވިދާޅުވެއްޖެއެވެ.

މި ހާދިސާއާ ގުޅިގެން ވަޒީރު ކުރެއްވި ފޭސްބުކު ޕޯސްޓެއްގައި ވިދާޅުވީ، ސްކޫލުގެ އެއް އިމާރާތް އަނދައިގެން ދިއުމަކީ ލިބުނު ވަރަށް ބޮޑު ދެރައެއް އަދި ގެއްލުމެއް ކަމަށެވެ.

މި އަލިފާނުގެ ހާދިސާގައި ސްކޫލުގެ ޕްރައިމަރީ ޓީޗަރުންގެ ސްޓާފްރޫމާއި، ޕްރިންޓިންގ ރޫމްގެ އިތުރުން އެއް ކިލާސްރޫމް އެއްކޮށް އަނދާފައިވާކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ކުރިއަށް އޮތް ހަފްތާގެ ކިޔެވުން ފެށެންވާއިރަށް ޕްރިންޓިންގ ރޫމަށް ބޭނުންވާ މެޝިނަރީއާއި، މުދައްރިސުންނަށް ބޭނުންވާ ކޮމްޕިއުޓަރާއި ފަރުނީޗަރު ލިބޭނެ އިންތިޒާމު މިނިސްޓްރީން ހަމަޖައްސާނެ ކަމަށެވެ. އަދި ދަރިވަރުންގެ ކިޔެވުން ހުއްޓުމެއް ނެތި ކުރިއަށް ގެންދެވޭނެ ގޮތަށް ސްކޫލުގެ ކަންކަން އިންތިޒާމް ކުރައްވާނެ ކަމަށްވެސް ވިދާޅުވިއެވެ.

މި ހާދިސާގައި އަލިފާން ނިއްވުމަށް ކުރެވުނު މަސައްކަތް ފާހަގަކުރައްވައި، ވަޒީރު ވަނީ އެ މަސައްކަތުގައި ބައިވެރިވި ހުރިހާ ފަރާތްތަކަށް ޝުކުރު އަދާކުރައްވާފައެވެ. ވަކިން ހާއްސަކޮށް ވިލިނގިލީގެ ރައްޔިތުން އިސްނަގައިގެން އަލިފާން ނިއްވުމުގައި ދިން އެހީތެރިކަމާއި ކުރި ބުރަ މަސައްކަތް ފާހަގަކޮށް، އެޑިޔުކޭޝަން މިނިސްޓްރީގެ ނަމުގައި ރައްޔިތުންނަށް ވަޒީރު ވަނީ ހާއްސަ ޝުކުރެއް ދަންނަވާފައެވެ.