ރޭ މެންދަމުގެ ވަގުތެއްގައި ހުޅުމާލޭ ދެވަނަ ފިޔަވަހީގައި ހުންނަ ދޯދި ޓަވަރު ކައިރީ ކުނިތަކުގައި ރޯވި ހާދިސާގައި މީހަކަށް އަދި އިމާރާތަކަށް ގެއްލުމެއް ނުލިބޭކަމަށް އެ ޓަވަރުތަކުގެ ބަލަދުވެރި ފަރާތުން ބުނެފިއެވެ.
މިކަމާ ގުޅިގެން ފަހިދިރިއުޅުން ކޯޕަރޭޝަން (އެފްޑީސީ) އިން އެކްސްގައި ކުރި ޕޯސްޓެއްގައި ބުނެފައިވަނީ ދޯދި ޓަވަރު 11 ކައިރީ ހުރި ކުނިތަކެއްގައި ރޯވި ހާދިސާގައި އެ ހިސާބުގެ އެއްވެސް ޓަވަރަކަށް އަދި މީހަކަށްވެސް ގެއްލުމެއް ލިބިފައިނުވާކަމަށެވެ. ރޭ ގާތްގަނޑަކަށް 02:21 ހާއިރު ހިނގި މި ހާދިސާގައި ރޯވެފައިވަނީ ކުނިތަކެއްގައެވެ.
މި ހާދިސާގައި އިމާރާތަކަށް އަދި މީހަކަށް ގެއްލުމެއް ނުވިނަމަވެސް އެ ސަރަހައްދުގައި މަސައްކަތް ކުރަން އުޅޭ ކޮންސްޓްރަކްޝަން ކުންފުނީގެ ބައެއް ތަކެއްޗަށް ވަނި އަލިފާނުގެ އަސަރުކޮށްފައެވެ.
ރޯވި ސަރަަހައްދު... ފޮޓޯ: ވޮއިސް
އެފްޑީސީން ބުނީ އަލިފާން ރޯވުމާއެކު އެމްއެންޑީއެފް މާލެ އޭރިއާ ކޮމާންޑް، ހުޅުމާލޭ ފަޔަރ ސްޓޭޝަންގެ ފަޔަރ ފައިޓަރުން އެ ސަރަހައްދަށް އައިސް އަލިފާން ނިއްވާލުމުގެ މަސައްކަތް ކޮށްފައިވާކަމަށެވެ. މި ހާދިސާ ކަމާބެހޭ ފަރާތްތަކުގެ އެހީތެރިކަމާއެކު ބަލަމުން އަންނަ ކަމަށްވެސް އެފްޑީސީން ވަނީ ބުނެފައެވެ.
ފަހިދިރިއުޅުން ޓަވަރުތައް ކައިރީ ކުނިބުނި ޖަމާކޮށްފައި ބެހެއްޓުމަކީ ވަރަށް އާއްމުކަމެކެވެ. މިކަމާ ގުޅިގެން އެފްޑީސީން ވަނީ ޓަވަރުތައް ހިމެނޭ ސަރަހައްދުތަކަށް ކުނިތައް ނޭޅުމަށް ތަކުރާރުކޮށް އަންގާފައެވެ. ނަމަވެސް ބައެއް ފަރާތްތަކުން ކަރުދާހާއި އެނޫންވެސް ތަކެތި އެކި ސަރަހައްދުތަކަށް ޖަމާކުރަމުންދާކަން ފާހަގަކޮށްލެވެއެވެ.
އަމާން ދޯދި ޓަވަރުތައް ކައިރީ ކުނިތަކެއް ޖަމާކޮށްފައި... ފޮޓޯ: ވޮއިސް
ފަހިދިރިއުޅުން ޓަވަރުތައްދޮށަށް ކުނިއަޅަމުންދާ މައްސަލާގައި އެންމެފަހުން އެފްޑީސީން ވަނީ ކުނިއަޅާ މީހުން ފާހަގަކޮށް ޖޫރިމަނާކުރަންވެސް ފަށާފައެވެ. އެގޮތުން މިހާތަނަށް އާއިރު ބައެއް މީހުން ވަނީ ޖޫރިމަނާކޮށްފައެވެ.
އުލޫފާ ހިލާފަށް ތަންތަނަށް ކުނި ނޭޅުމަށް ތަކުރާރުކޮށް ނަސޭހަތް ދިން ނަމަވެސް ކުނިއަޅަމުންދާކަން ފާހަގަކޮށް އެފްޑީސީން ބުނެފައިވަނީ ގޭބިސީތަކުގައި އުފެދޭ ކުނި އުކާލަންވާނީ ހަމައެކަނި ގްރައުންޑް ފްލޯގައި ހުންނަ ގާބޭޖް ރޫމްގައި އެކަމަށް ހާއްސަކޮށްފައި ހުންނަ ކުނިވަށިތަކަށް ކަމަށެވެ. އެގޮތުން އެޕާޓްމަންޓަށް ބަދަލުވާއިރު އެއްޗެހި ގެންނަ ކަރުދާސް ފޮށިތަކާއި، އެނޫންވެސް ކުނިބުނި އުކާލުމަކީ ތަނުގެ ވެރިފަރާތުގެ ޒިންމާއެއްކަމަށް އެޗްޑީއެފްސީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
