ނުކުޅެދުންތެރިކަން ހުންނަ ފަރާތްތަކުގެ ބަދަލުގައި އެފަރާތްތަކުގެ ބެލެނިވެރިޔާއަށް ފްލެޓަށް ކުރިމަތިލެވޭގޮތަށް އުސޫލް އިސްލާހް ކުރުމުގެ މަސައްކަތް ކުރަމުންދާކަމަށް ގެދޮރުވެރިކަމާއި ބެހޭ ވަޒީރު ޑރ. އަބްދުﷲ މުއްޠަލިބު ވިދާޅުވެއްޖެއެވެ.

އެކްސްގައި މިއަދު ކުރެއްވި ޕޯސްޓެއްގައި ވަޒީރު، މުއްތަލިބް ވިދާޅުވީ، އާއިލީ ބޯހިޔާވަހިކަން ޕްރޮގްރާމުގެ ދަށުން "ނުކުޅެދުންތެރިކަން ހުންނަ ފަރާތްތަކުގެ ކެޓަގަރީ" ގެ ޝަރުޠުތައް އިސްލާޙުކުރުމުގެ މަސައްކަތް ފަށާފައިވާކަމަށެވެ.

އެގޮތުން ވަކިން ފުލެޓަށް އެދި ހުށަހެޅުމަށް މިމިނިސްޓްރީން ހުޅުވާލިއިރު، ނުކުޅެދުންތެރިކަން ހުންނަ ފަރާތްތަކަށް ނުވަތަ އެފަދަ ފަރާތްތަކުގެ ބަދަލުގައި އެފަރާތްތަކުގެ ބެލެނިވެރިންނަށް ކުރިމަތިލެވޭ ގޮތަށް އުސޫލު އިޞްލާޙުކުރުމުގެ މަސައްކަތް ކުރެވެމުންދާކަމަށް ވަޒީރު ވިދާޅުވިއެވެ.

ނުކުޅެދުންތެރިކަން ހުންނަ ފަރާތްތަކުގެ ކެޓަގަރީގެ އެޕްލައިކުރުމުގެ އުސޫލް އިސްލާހްކުރުމުގެ މަސައްކަތް ފަށާފައިވާކަމަށް ގެދޮރުވެރިކަމާއި ބެހޭ ވަޒީރު ޑރ. އަބްދުﷲ މުއްޠަލިބު ވިދާޅުވިއިރު، މިކަމަކީ ގިނަބަޔަކަށް އޮޅުންއަރާގޮތަށް އެކުލަވާލާފައިވާ އުސޫލެއްކަމަށް ގިނަ ފަރާތްތަކުން އަންނަނީ ބުނަމުންނެވެ. އެގޮތުން އީފާސް މެދުވެރިކޮށް ބޯހިޔާވަހިކަމުގެ ޕޯޓަލް މެދުވެރިކޮށް ފްލެޓަށް އެދުމުގެ ކަންކަން އޮންނައިރު، ނުކުޅެދުންތެރިކަން ހުންނަ ފަރާތެއްގެ ނަމުގައި އީފާހުން ލޮގިންވެގެން އެކަން ކުރުމަކީ ތަކްލީފެއްގެ އިތުރުން ހަމަޖެހޭ އުސޫލެއް ނޫންކަމަށް ގިނަ ފަރާތްތަކަކުން ވަނީ ފާހަގަކޮށްފައެވެ.

މީގެ އިތުރުންވެސް "ނުކުޅެދުންތެރިކަން ހުންނަ ފަރާތްތަކުގެ ކެޓަގަރީ" ގައި އެކުލަވާލާފައިވާ ބައެއް އުސޫލްތަކާ ގުޅޭގޮތުން ގިނަ މީހުންވަނީ ކަންބޮޑުވުން ފާޅުކޮށްފައެވެ. މީގެ ތެރޭގައި ސަރުކާރުގެ އިދާރާތަކުން ހޯދަންޖެހޭ ލިޔެކިޔުންތައް ހޯދައި ޕޯޓަލަށް އަޕްލޯޑްކުރަންޖެހުމަކީވެސް ތަކްލީފެއްކަމަށް ގިނަ ފަރާތްތަކަކުން ވަނީ ފާހަގަކޮށްފައެވެ.