ކުރިއަށް އޮތް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަންގައި ވާދަ ނުކުރައްވާނެ ކަމުގެ އިޝާރާތެއް އެ ދާއިރާގެ ކުރީގެ މެންބަރު މުހައްމަދު އަސްލަމް ދެއްވައިފި އެވެ.
އަސްލަމަކީ ބަރުލަމާނީ ހަޔާތުގައި ވަރަށް ބޮޑު ހިދުމަތްތެރި އެކެވެ. އައްޑޫއާ އައްޑޫ ހިތަދޫ އަދި ހިތަދޫ އުތުރު ދާއިރާގެ ގޮނޑި ފުރުއްވާފައިވެ އެވެ.
ހިތަދޫ އުތުރު ދާއިރާގެ ބައި އިލެކްޝަނެއް ބާއްވަން ޖެހުނީ ޕީއެންސީގެ މެންބަރު މުހައްމަދު ސިނާނުގެ ގޮނޑި ގެއްލިފައިވާކަމަށް ސުޕްރީމް ކޯޓުން މިއަދު ހުކުމްކުރުމާއި ގުޅިގެންނެވެ. ގޮނޑި ގެއްލުނީ ސާބިތު ދަރަންޏެއް އޮތުމުންނެވެ.
އެ ނިންމުމާއެކު އައްޑޫ ސިޓީގެ ކުރީގެ މޭޔަރު ސޯދިގު (ސޯބެ) ވަނީ އެމްޑީޕީގެ ޓިކެޓްގައި ވާދަކުރުމުގެ ޝައުގުވެރިކަން ފާޅުކޮށްފަ އެވެ. ކުރީން ބެލެވުނީ އަސްލަމް ވެސް އެ ގޮނޑިއަށް ވާދަ ކުރާނެ ކަމަށެވެ.
ނަމަވެސް އަސްލަމް މިރޭ ވަނީ ސޯބެގެ ނިންމުމަށް މަރުހަބާ ކިޔާފަ އެވެ. އަދި އޭނާގެ ފުރިހަމަ ތާއީދާއި އެއްބާރުލުން ލިބޭ ކަމުގައި ވިދާޅުވި އެވެ.
2024 ވަނަ އަހަރު އޮތް މަޖިލީސް އިންތިހާބުގައި ސިނާން ވަނީ އަސްލަމް ބަލިކޮށްފަ އެވެ. އެއާއެކު މެދުކެނޑުމެއް ނެތި އެތައް އަހަރެއް ވަންދެން އަސްލަމް, މަޖިލީހުގައި އަދާކުރަމުން އައި މެންބަރުކަން ގެއްލުނެވެ.
Advertisement
This content is created and paid for by advertisers and does not involve Voice Journalists
