ސީލައިފް ގްލޯބަލް އިންކް ޕްރައިވެޓް ލިމިޓެޑްގެ މެނޭޖިން ޑިރެކްޓަރު އަޙްމަދު މޫސާ މުޙައްމަދު (އަންމަޓީ) ގެ ޕާސްޕޯޓް ހިފަހައްޓަން ހައިކޯޓުން އަމުރު ނެރެފި އެވެ.
އެ ކޯޓުން އެ އަމުރު ނެރުނީ ޕީޖީ އޮފީހުން އެކަމަށް އެދި ހުށައެޅުމުންނެވެ.
އަންމަޓީގެ މައްޗަށް ކްރިމިނަލް ކޯޓަށް ހުށަހެޅި ހިޔާނާތްތެރިވުމުގެ ކުށުގެ 42 ދަޢުވާ ސާބިތުނުވާ ކަމަށް ކްރިމިނަލް ކޯޓުން ވަނީ ނިންމާފަ އެވެ. އެ ކޯޓުން އެ ނިންމުން ނިންމީ މި މަހުގެ ނުވަވަނަ ދުވަހު އެވެ.
ޕީޖީ އޮފީހުން މިރޭ ބުނީ އެ ނިންމި ނިންމުން އިސްތިއުނާފުކުރުމަށް މި މަހުގެ 11 ވަނަ ދުވަހު ހައިކޯޓަށް ހުށަހަޅާފައިވާ ކަމަށެވެ.
އެ އޮފީހުން ހައިކޯޓުގައި އެދިފައިވާނީ މި މައްސަލައިގެ ހެކި ޤަރީނާ ކޯޓުން ވަޒަންކޮށްފައިވަނީ ގާނޫނާ ޚިލާފަށް ކަމަށް ކަނޑައަޅައިދިނުމަށާއި މިއީ މަދަނީ ޠަބީޢަތުގެ މައްސަލައެއްކަމަށް ކޯޓުން ކަނޑައަޅާފައިވަނީ އަދި ޤާނޫނުގައި ބަޔާންކޮށްފައިވާ ޚިޔާނާތްތެރިވުމުގެ ކުށުގެ ޢުންޞުރުތައް މާނަކޮށްފައިވަނީ ޤާނޫނާ ޚިލާފަށްކަމަށް ކަނޑައަޅައިދިނުމަށެވެ. އަދި މި ދަޢުވާތައް ސާބިތުވާ ކަމަށް ކަނޑައަޅައިދިނުމަށެވެ.
މީގެ އިތުރުން، މައްސަލައިގެ އިސްތިއުނާފު މަރުޙަލާ ނިމެންދެން އަންމަޓީ ފުރުން މަނާކުރުމުގެ އަމުރަކަށް އެދި ޕީޖީ އޮފީހުން ހައިކޯޓަށް ހުށަހެޅުމުން، އޭނާގެ ޕާސްޕޯޓް ހިފެހެއްޓުމުގެ ވަގުތީ އަމުރެއް ވަނީ ނެރެފަ އެވެ.
Advertisement
This content is created and paid for by advertisers and does not involve Voice Journalists
