އިނގިރޭސިވިލާތުގެ ލިވަޕޫލް ކަޓުވާލުމަށްފަހު ޗެމްޕިއަންސްލީގް ސެމީފައިނުގެ ޖާގައެއް ފްރާންސްގެ ޕީއެސްޖީ ކަށަވަރުކޮށްފިއެވެ.
ރޭ ދެވަނަ ލެގްގެ މެޗަށް ނިކުތްއިރުވެސް ޕީއެސްޖީން ވަނީ ފުރަތަމަ ލެގް ޕެރިހުގައި ކުޅުނުމެޗް 0-2 ގެ ނަތީޖާއަކުން ކާމިޔާބުކޮށް ސެމީއަށް ދިއުމުގެ ފުރުސަތު ބޮޑުކޮށްފައެވެ.
ދެވަނަ ލެގްގައި ރޭ ލިވަޕޫލްގެ އެންފީލްޑްގައި ކުޅުނު މެޗް ޕީއެސްޖީން ކާމިޔާބުކުރީ 0-2 ގެ ނަތީޖާއަކުންނެވެ. ރޭގެ މެޗްގައި ޕީއެސްޖީގެ ތަރިއކަަށްވީ ޑެމްބެލޭ އެވެ. އޭނާ ވަނީ މެޗްގައި މޮޅު ކުޅުމެއް ދައްކައި ދެ ލަނޑު ޖަހާފައެވެ. ފުރަތަމަ ލަނޑު ޑެމްބެލޭ ކާމިޔާބުކުރީ، 72 ވަނަ މިނެޓް ތެރޭގައެވެ. އަދި ފަހު ލަނޑު ޖެހީ މެޗްގެ އިތުރުވަގުތުގެ ކުޅުމުގެ ތެރޭގައެވެ.
މެޗުން ލިވަޕޫލް ބަލިވުމުން އެޓީމް ވަނީ މި ސީޒަން ހުސްއަތާ ނިންމާލަން ޖެހިފައެވެ. އަދި މި މެޗަކީ މިހިނގާ ސީޒަނުގައި ލިވަޕޫލް ބަލިވި 17 ވަނަ މެޗެވެ. މެޗްގައި ލިވަޕޫލްގެ ކޯޗް އާނެ ސްލޮޓް ވަނީ ރިސްކެއް ނަގައި ވަރަށް ގިނަ ދުވަހު އަނިޔާގައި ހުރި އެލެކްސެންޑާ އީސާކް ފުރަތަމަ އެގާރާގައި ހިމަނައި ކުޅެން އަރުވާފައެވެ.
މެޗަށް ފަހު މުޙައްމަދު ޞަލާޙް އެންފީލްޑް ސަޕޯޓަރުންނާ ވަދާއީ ސަލާމް ކުރިއިރު، ގަބޫލުކުރެވޭ ގޮތުގައި މިއީ ލިވަޕޫލްގައި ސަލާހް ކުޅޭނޭ އެންމެ ފަހު ސީޒަނެވެ.
ޔުއެފާ ޗެމްޕިއަންސްލީގް ސެމީފައިނަލްގައި ޕީއެސްޖީ ނިކުންނާނީ، މިރޭ ބެޔާން މިއުނިކާއި ރެއާލް މެޑްރިޑް ބައްދަލުކުރާ މެޗުން މޮޅުވާ ޓީމަކާއެވެ.
Advertisement
This content is created and paid for by advertisers and does not involve Voice Journalists
