ގދ.ތިނަދޫގައި ގާއިމްކުރުމަށް މަސައްކަތް ކުރަމުންދާ ނަފްސާނީ މައްސަލަތަކަށް ފަރުވާދޭ ކްލިނިކްގެ ހިދުމަތް މިއަހަރު ފެށުމަށް ތައްޔާރުވުމުގެ މަސައްކަތް ފަށައިފިއެވެ.
މިކަމާ ގުޅޭގޮތުން ޕަބްލިކް ސާވިސް މީޑިއާއަށް ދެއްވި ބަސްދީގަތުމެއްގައި ޑރ. އަބްދުއްސަމަދު މެމޯރިއަލް ހޮސްޕިޓަލުގެ ސީއީއޯ އަޙްމަދު އަޝްރަފް ވަނީ މިކަން މިހާރު ކުރިއަށް ގޮސްފައިވާ ހިސާބު ހިއްސާ ކުރައްވާފައެވެ. އަޝްރަފް ވިދާޅުވީ، ހުވަދު އަތޮޅުގައި ނަފްސާނީ މައްސަލަތަކަށް ފަރުވާ ހޯދަންޖެހޭ އާއިލާތައް ގިނަކަން ފާހަގަކުރެވޭ ކަމަށެވެ. ވަކިން ހާއްސަ ގޮތެއްގައި ވެރިރަށް ތިނަދޫގައި ނަފްސާނީ މައްސަލަތައް ފާހަގަކޮށްލެވޭ މިންވަރަކަށް އިތުރުކަން އަޝްރަފް ވިދާޅުވިއެވެ.
ރަސްމީކޮށް އެއްކުރެވުނު މައުލޫމާތުގެ އަލީގައި ތިނަދޫގައި އެލާމިން ލެވެލްގައި ނަފްސާނީ މައްސަލަތައް އިތުރުވެފައިވާކަމަށް ދައްކާއިރު، ސަރުކާރުން ވަނީ އަބްދުއްސަމަދު މެމޯރިއަލް ހޮސްޕިޓަލުގައި ނަފްސާނީ މީހުންނަށް ފަރުވާދޭ ޔުނިޓެއް ގާއިމްކުރުމުގެ މަސައްކަތް ފަށާފައެވެ.
އަޝްރަފް ވިދާޅުވީ ނަފްސާނީ މީހުންނަށް ފަރުވާދޭ ޔުނިޓް މިއަހަރުގެ ތެރޭގައި ހުޅުވައި ހިދުމަތް ދިނުމަށް ތައްޔާރުވަމުން އަންނަކަމަށެވެ. ޔުނިޓްގެ މަސައްކަތް ފަށާއިރު އެކަމަށް ބޭނުންވާ ޑޮކްޓަރުންނާއި އެނޫންވެސް ވަސީލަތްތައް ގާއިމްވެފައި ހުންނާނޭކަމަށް އޭނާ ވަނީ ފާހަގަކުރައްވާފައެވެ.
ތިނަދޫގައި ނަފްސާނީ ފަރުވާދޭ ޔުނިޓެއް ގާއިމްކުރުމުގެ މަސައްކަތް ފަށައި މިއަހަރު އެތަނުގެ ހިދުމަތްދިނުމަށް ތައްޔާރުވަމުންދާއިރު، ދާދި ފަހަކުން ގދ އަތޮޅު ތައުލީމީ މަރުކަޒުގެ ދަރިވަރަކު ރުޅިގަދަވެ ޓީޗަރަކަށް ހަމަލާދިން މައްސަލައެއް ވަނީ ފެންމަތިވެފައެވެ. މި މައްސަލާގައި ދަރިވަރުގެ ހަމަލާ އަމާޒުވި ޓީޗަރަށް އަނިޔާވިއިރު ލިބުނު އަނިޔާއިން އަރައިގަތުމަށް ސާޖަރީއެއް ކުަރަން ޖެހޭަކަމަށްގ ޓީޗަރުގެ އާއިލާއިން ވަނީ ބުނެފައެވެ.
މި މައްސަލާގައި ތައުލީމީ ވުޒާރާއިން ބައެއް މީޑިއާތަކަށް ހިއްސާކުރި މައުލޫމާތުތަކަށް ބަލާއިރު ހަމަލާދިން ދަރިވަރަކީ ރުޅިގަދަވުމުގެ މައްސަލަ ހުންނަ ދަރިވަރެކެވެ. އެ ދަރިވަރު މިހާރު ސަސްޕެންޑްކޮށްފައިވާ ކަމުގެ މައުލޫމާތު ލިބެއެވެ.
Advertisement
This content is created and paid for by advertisers and does not involve Voice Journalists
