ރާއްޖޭގެ ކަނޑުތަކުގެ ލޮނުގަނޑު ހޫނުވެ، ހުވަދު އަތޮޅުގެ ފަރުތަކުން މުރަކަ ހުދުވުމުގެ ނިޝާންތައް ފެންނަން ފަށާފައިވާ ކަމަށް "ޓާޗުއިޝް ލެބް" އިން ހާމަކޮށްފިއެވެ.

ޓާޗުއިޝް ލެބުން ބުނީ، އެފަރާތުން ހިންގާ "ކޮރަލް ސްޕޯނިންގ ރެސްޓޮރޭޝަން އިނީޝިއޭޓިވް" ގެ ދަށުން ފާއިތުވި ހަފުތާތަކުގައި ހުވަދު އަތޮޅުގެ އެކި ސަރަހައްދުތަކަށް ކުރި ޑައިވްތަކުން ކަންބޮޑުވާންޖެހޭ ފަދަ މަންޒަރުތަކެއް ފެނިފައިވާ ކަމަށެވެ.

މި ދިރާސާތަކުން ދައްކާ ގޮތުގައި، ހުވަދު އަތޮޅުގެ 10 މީޓަރު ފުނުގައި ހުރި ފަރުތަކުގެ ފިނިހޫނުމިން އާންމުކޮށް ހުންނަނީ 29 ޑިގްރީ ސެލްސިއަސްގައެވެ. ނަމަވެސް، މިހާރު ރޭގަނޑުގެ ވަގުތުތަކުގައި ވެސް އެ ފުންމިނުގައި ފިނިހޫނުމިން ހުރީ 31 ޑިގްރީ ސެލްސިއަސްގައެވެ. މިއީ އާންމު މިންގަނޑަށް ވުރެ 2 ޑިގްރީގެ މަތީ މިންވަރެކެވެ.

މިކަމާ ގުޅޭގޮތުން ދާއިރާގެ މާހިރުން ފާހަގަކުރާ ގޮތުގައި، ރޭގަނޑު ލޮނުގަނޑު ފިނިނުވުމަކީ މުރަކަތަކަށް ލިބޭ ބޮޑު ހީޓް ސްޓްރެސްއެކެވެ. މީގެ ސަބަބުން މުރަކަތައް ރިކަވާވާން ފުރުސަތެއް ނުލިބެއެވެ.

ދިރާސާ ކުރާ ޓީމުން ބުނި ގޮތުގައި، ލޮނުގަނޑަށް އައިސްފައިވާ މި ބަދަލު ފަރުތަކަށް ފީނާ މީހުންނަށް ވެސް އެކަން އިހްސާސްވެއެވެ.

"މިއީ ހަމައެކަނި ހިސާބު އަކުރުތަކަކުން ފެންނަ ބަދަލެއް ނޫން. ޑައިވް ކުރާއިރު ލޮނުގަނޑު ހޫނުކަން އިހުސާސްވޭ. ފަރުތަކުން އެ ދަނީ ސާފު މެސެޖެއް ދެމުން، އަޅުގަނޑުމެން އެ އަޑު އަހަންޖެހޭ،" ދިރާސާގައި ބައިވެރިވި ފީލްޑް ރިސާޗަރަކު ބުންޏެވެ.

މި ދުވަސްވަރަކީ ރާއްޖޭގެ ގިނަ ސަރަހައްދުތަކަށް ހޫނުގަދަ ދުވަސްވަރަކަށް ވުމާއެކު، ކަނޑުގެ ދިރުންތަކަށް މިކަމުގެ ނޭދެވޭ އަސަރު ފޯރަމުންދާތީ ތިމާވެށި ރައްކާތެރިކުރުމަށް މަސައްކަތްކުރާ ފަރާތްތަކުން ދަނީ މިކަމަށް ސަމާލުވެ، ބައެއް މަޝްރޫޢުތައް ހުއްޓާލުމަށްވެސް ގޮވާލަމުންނެވެ.