ލުބުނާނަށް އިސްރާއީލުން ދެމުންގެންދިޔަ ހަމަލާތައް މެދުކަނޑާލަން އެއްބަސްވުމާއެކު، އެ އެއްބަސްވެފައިވާ ސުލްހައިގެ މުއްދަތުގެ ތެރޭގައި، ހޮރްމޫޒް ކަނޑުއޮޅި މުދާ އުފުލާ ހުރިހާ އުޅަނދުތަކަށް އެއްކޮށް ހުޅުވާލާފައިވާ ކަމަށް އީރާނުން ހާމަކޮށްފިއެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ އެކްސްގައި ކުރެއްވި ޕޯސްޓެއްގައި ވިދާޅުވީ، ލުބުނާނުގައި ގާއިމުކޮށްފައިވާ 10 ދުވަހުގެ ސުލްހައިގެ އެއްބަސްވުމާ އެއްގޮތްވާ ގޮތުގެ މަތިން، ހޮރްމޫޒް ކަނޑުއޮޅިން ދަތުރުކުރާ ހުރިހާ ވިޔަފާރި އުޅަނދުތަކަށް މަގު ހުޅުވާލާފައިވާ ކަމަށެވެ.

އަދި މި ދަތުރުތައް ކުރިއަށްދާނީ އީރާނުގެ ޕޯޓްސް އެންޑް މެރިޓައިމް އޯގަނައިޒޭޝަނުން ކުރިން ކަނޑައަޅާފައިވާ މަގުން ކަމަށްވެސް އޭނާ ވިދާޅުވިއެވެ.

އިގްތިޞާދީ ތަޖުރިބާކާރުން ބުނާގޮތުން، އީރާނުގެ މި ނިންމުމަކީ މާކެޓަށް އައި ވަރަށް ބޮޑު ކުރިއެރުމެކެވެ. އަދި، މި ޚަބަރާއެކު ދުނިޔޭގެ ބާޒާރުގައި ތެލުގެ އަގަށް ވަނީ ބޮޑު ބަދަލެއް އައިސްފައެވެ.

އެގޮތުން ސާފުނުކުރާ ތެލުގެ އަގު %10.6 ދަށަށް ގޮސްފައިވާއިރު، އެސް އެންޑް ޕީ 500 ހަކަތައިގެ ދާއިރާ ވަނީ %4.5 އަށް ވެއްޓިފައެވެ. މީގެ އިތުރުން މަޝްހޫރު ތެޔޮ ކުންފުނިތައް ކަމަށްވާ އެކްސަން މޮބިލް އަދި ޝެވްރަންގެ ހިއްސާގެ އަގުވެސް ވަނީ ވަރަށް ބޮޑަށް ދަށަށް ގޮސްފައެވެ.