ދުނިޔޭގެ އެންމެ މުހިންމު އެއް ކަނޑުގެ މަގު ކަމަށްވާ ހޮރްމުޒް ކަނޑުއޮޅިން ދަތުރުކުރާ ހުރިހާ ވިޔަފާރި އުޅަނދުފަހަރަކަށް އެ ސަރަހައްދު ހުޅުވާލާފައިވާ ކަމަށް އީރާނުން މިއަދު އިއުލާނުކުރުމާ ގުޅިގެން، ދުނިޔޭގެ ބާޒާރުގައި ތެލުގެ އަގު 13 އިންސައްތަ ދަށަށް ވެއްޓިއްޖެއެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، ލުބުނާނުގައި ހަނގުރާމަ ހުއްޓާލުމަށް އެއްބަސްވެފައިވާ މުއްދަތުގައި، ހޮރްމުޒް ކަނޑުއޮޅިން ދަތުރުކުރާ ހުރިހާ ވިޔަފާރި އުޅަނދަކަށް ފުރުސަތު އޮންނާނެ ކަމަށެވެ.

މީގެ އިތުރުން، އެމެރިކާގެ ރައީސް ޑޮނަލްޑް ޓްރަމްޕް ވަނީ ދެން ދުވަހަކުވެސް އެ ކަނޑުއޮޅި ބަންދުނުކުރުމަށް އީރާނުން އެއްބަސްވެފައިވާ ކަމަށް ބުނެފައެވެ.

މި ކުރިއެރުންތަކާއެކު، ބްރެންޓް ކްރޫޑް ފިއުޗާސްގެ އަގު 12.95 އިންސައްތަ ދަށަށް ގޮސް، ފީފާއެއްގެ އަގު ވަނީ 86.52 ޑޮލަރަށް ވެއްޓިފައެވެ. އަދި އެމެރިކާގެ ވެސްޓް ޓެކްސަސް އިންޓަރމީޑިއަޓް (ޑަބްލިއު.ޓީ.އައި) ކްރޫޑް ފިއުޗާސްގެ އަގު 13.50 ޑޮލަރު ނުވަތަ 14.26 އިންސައްތަ ދަށަށް ގޮސް، ފީފާއެއްގެ އަގު ވަނީ 81.19 ޑޮލަރަށް ތިރިވެފައެވެ. މިއީ މާރިޗު މަހުގެ 10 ވަނަ ދުވަހުގެ ފަހުން ތެލުގެ އަގު މިހާ ބޮޑަށް ދަށަށްދިޔަ ފުރަތަމަ ފަހަރެވެ.

މެދުއިރުމަތީގެ މަސްރަހު ފިނިވަމުންދާކަމުގެ ނިޝާންތައް ފެންނަމުންދާއިރު، ރައީސް ޓްރަމްޕް ބުނީ އީރާނާއެކު އެއްބަސްވުމަކަށް އައުމާ ވަރަށް ގާތްވެފައިވާ ކަމަށެވެ. އަދި ކުރިއަށް އޮތް 20 އަހަރަށް ނިއުކްލިއަރ ހަތިޔާރު ނުގެންގުޅުމަށް އީރާނުން ހުށަހަޅާފައިވާ ކަމަށްވެސް ޓްރަމްޕް ބުނެއެވެ. މީގެ އިތުރުން، ލުބުނާނަށް ބޮން އެޅުން ހުއްޓާލުމަށް އެމެރިކާއިން އިސްރާއީލަށް އަންގާފައިވާ ކަމަށްވެސް ރައީސް ޓްރަމްޕް ބުނެފައިވެއެވެ.

ނަމަވެސް، އެމެރިކާގެ އޮފިޝަލަކު ބުނީ ކަނޑުއޮޅި ހުޅުވާލި ނަމަވެސް، 10،000 އަށްވުރެ ގިނަ ސިފައިންނާއެކު އީރާނާ ދެކޮޅަށް އަސްކަރީގޮތުން އަޅާފައިވާ ހުރަސްތައް އަދިވެސް ދެމިއޮތް ކަމަށެވެ.

އިގްތިސާދީ މާހިރުން ފާހަގަކުރާ ގޮތުގައި، ކަނޑުއޮޅި ހުޅުވާލުމަކީ ރަނގަޅު ފިޔަވަޅެއް ނަމަވެސް، ގަލްފުން ފުރާ އުޅަނދުފަހަރު ޔޫރަޕަށް ދިއުމަށް ގާތްގަނޑަކަށް 21 ދުވަސް ނަގާނެތީ، ޔޫރަޕްގެ ބާޒާރުގައި ތެލުގެ ދަތިކަން އަދި ކޮންމެވެސް ވަރަކަށް ދެމިއޮންނާނެއެވެ.

އަދި އީރާނުގެ ނިއުކްލިއަރ މައްސަލައިގައާއި ދަތިކުރުމުގެ ފިޔަވަޅުތައް އުވާލުމުގައި އެއްބަސްވުމަކަށް ނާދެވިއްޖެނަމަ، އަލުން ކަނޑުއޮޅި ބަންދުވުމުގެ ބިރު އޮތްކަމަށްވެސް މާހިރުން އިންޒާރު ދެއެވެ.