އިނގިރޭސި ޕްރިމިއާ ލީގްގައި ރޭ ޗެލްސީ ބަލިކޮށް މެންޗެސްޓަރ ޔުނައިޓެޑުން ކުރިއަށް އޮތް ޗެމްޕިއަންސްލީގުން ޖާގައެއް ހޯދުމުގެ ފުރުސަތު ތަނަވަސްކޮށްފިއެވެ.

ޗެލްސީގެ ދަނޑުގައި ކުޅުނު މިމެޗް، ޔުނައިޓެޑް ކާމިޔާބުކުރީ 0-1 ގެ ނަތީޖާއަކުންނެވެ. މި މެޗްގައި ޔުަނައިޓެޑުން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ، ފުރަތަމަ ހާފްގެ 43 ވަނަ މިނެޓް ތެރޭގައި ފެނާންޑެޒް ތަނަވަސްކޮށްދިން ފުރުސަތެއްގައި ކުންހާއެވެ. 

ޔުނައިޓެޑުން މޮޅަށް ކުޅުނު ނަމަވެސް މިމެޗްގައި ލަނޑު ޖަހާނެ ރަނގަޅު ފުރުސަތުތައް ހޯދީ ޗެލްސީއެވެ. ނަމަވެސް މީގެ ތެރެއިން ނުރައްކާތެރި ހަމަލާތައް މެންޗެސްޓަރ ޔުނައިޓެޑްގެ ކީޕަރު ވަނީ ދިފާއުކޮށްފައެވެ.

މެންޗެސްޓަރ ޔުނައިޓެޑާއި ޗެލްސީ ބައްދަލުކުރިމެޗްގެ ތެރެއިން.. ފޮޓޯ: ސްކައި ސްޕޯޓްސް

މެޗުން ޔުނައިޓެޑް މޮޅުވުމުން އެޓީމް ވަނީ ލިބުނު ތިން ޕޮއިންޓާއެކު، ތާވަލްގެ ތިންވަނައަށް ޖެހިލާފައެވެ. އިނގިރޭސި ޕްރިމިއާ ލީގް ޕޮއިންޓް ތާވަލް މިހާރު އޮތްގޮތަށް ބަލާއިރު، 58 ޕޮއިންޓާއެކު މެންޗެސްޓަރ ޔުނައިޓެޑް ތާވަލްގެ ތިން ވަނާގައި އުޅޭއިރު 55 ޕޮއިންޓާއެކު ތާވަލްގެ ހަތަރު ވަނާގައި އެސްޓަންވިލާއެވެ. ޗެލްސީ އުޅެނީ 48 ޕޮއިންޓާއެކު ތާވަލްގެ 6 ވަނާގައެވެ. 

ޗެލްސީއަށް ޗެމްޕިއަންސް ލީގަށް ދިއުމުގެ އަމިއްލަ ބާރު ގެއްލިފައިވާއިރު، އެޓީމަށް ޔޫރަޕާލީގުން ޖާގަ ކަށަވަރު ކުރެވެން އޮތީވެސް ދެން ކުޅެންޖެހޭ ހުރިހާ މެޗްތަކެއް ކާމިޔާބުކޮށްގެންނެވެ.