‏ދަރިވަރުން ތަޢުލީމަށް ލޯބިކުރާނަމަ، އެ ދަރިވަރުންނަށް ކިޔަވައިދޭ މުދައްރިސުންނަށް އިހުތިރާމްކޮށް ލޯބިވާ ކުދިން ކަމުގައި ވާންޖެހޭ ކަމުގައި ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

މަޖީދިއްޔާ ސްކޫލްގެ 99 ވަނަ އަހަރީ ދުވަސް ފާހަގަކުރުމަށް ބޭއްވި ޚާއްސަ އެސެމްބްލީ ޝަރަފްވެރިކޮށްދެއްވާ ވާހަކަދައްކަވަމުން ވަޒީރު ވިދާޅުވީ، ތަޢުލީމީ ނިޒާމް ހަރުދަނާ ކުރުމަށް މި އަހަރު މުހިންމު މަސައްކަތްތަކެއް ފަށާފައިވާ ކަމަށެވެ. އެގޮތުން އެންމެ މުހިންމު އެއް ކަމަކީ ތަރުބަވީ ޚާއްސަ ޕްރޮގްރާމް ބިންގާކަން ފާހަގަކުރެއްވިއެވެ.

އެ ޕްރޮގްރާމަކީ ދަރިވަރުންގެ ހިތުގައި ކުލުނުވެރިކަމާ، އެހެންމީހުންނަށް، ޙާއްސަކޮށް މުދައްރިސުންނަށާއި، މައިންބަފައިންގެ އިތުރުން މުޖުތަމަޢުގައި ހިމެނޭ އެހެންމީހުންގެ އެހީ ބޭނުންވާ މީހުންނަށް އިހްތިރާމް ކުރުމާއި ގަދަރު ކުރުން ފަދަ ރިވެތި ސިފަތަކެއް އަށަގެންނެވުނުގެ މަގުސަދުގައި ކުރިއަށްގެންދާ ޕްރޮގްރާމެކެވެ.

އަދި މިއާއެކު ދަރިވަރުން އަމިއްލަ ނަފްސަށް އިތުބާރު ކުރުން ފަދަ ސިފަތައްވެސް އެކުލެވިގެން މުޅި އަހަރަށް ބަހާލައިގެން ކުރިއަށްގެންދާ ޕްރޮގްރާމެކެވެ. 

ވަޒީރުގެ ވާހަކައިގައި ވަޒީރުވަނީ ތަޢުލީމު ހާސިލްކޮށް ރަންވަނަ ހޯދުމުގެ އިތުރުން  ދިރިއުޅުމުގައި ބޭނުންވާ އެކިއެކި ހުނަރުތައްވެސް ކުދިން ދަސްކުރުމުގެ މުހިންމު ކަމަށް އަލިއަޅުވާލައްވާފައެވެ. 

މީގެ އިތުރުން، ކިޔެވުމަށް ލޯބިކުރާ ދަރިވަރުންނަކީ މުދައްރިސުން ދެކެވެސް ލޯބިވާ، އެ މުދައްރިސުންނަށް އިހްތިރާމްކުރާ ބަޔަކަށް ވުމަށް ނަޞޭޙަތްތެރިވެފައެވެ. 

ވަޒީރު ވިދާޅުވީ މީހާގެ ހަގީގީ ތަޞައްވުރު އެނގިގެންދާނީ އެހެންމީހުންނާ ދެމެދުގައި އުފެދޭ ކުލުނާއި އިހްތިރާމުން ކަމަށެވެ.

މަޖީދިއްޔާ ސްކޫލްގެ 99 ވަނަ އަހަރީދުވަސް ފާހަގަކުރުމަށް ބޭއްވި ޚާއްސަ އެސެމްބްލީގައި ވަޒީރު ޝަފީޢު ވަނީ އެ ސްކޫލްގެ އައު ވެބްސައިޓާއި ޔޫޓިއުބް ޗެނަލެއް އިފްތިތާހްކޮށްދެއްވާފައެވެ. އަދި ވަޒީރު ވަނީ، މަޖީދިއްޔާގެ 100 އަހަރުގެ ރަމްޒްކޮށްދިނުމުގެ ޚާއްސަ ބިނާގެ މަސައްކަތް 100 އަހަރު ފުރެންވާއިރަށް ނިންމާ ހުޅުވުމަށް މަސައްކަތް ކުރަމުންދާކަމަށް ވިދާޅުވެފައެވެ.