ބ. ހުޅުދޫގައި ބަޔަކު ވެލާ ފަޅައިގެން އޭގެ މަސް ކެއި ކަމަށް ތުހުމަތުކުރެވޭ މައްސަލައެއް ފުލުހުން ތަހުގީގުކޮށް، އެ މައްސަލައިގެ ރިޕޯޓު އެންވަޔަރަންމަންޓަލް ރެގިޔުލޭޓަރީ އޮތޯރިޓީ (އީއާރްއޭ) އަށް ފޮނުވައިފިއެވެ.

ފުލުހުން "ވޮއިސް" އަށް މައުލޫމާތު ދެމުން ބުނެފައިވަނީ، ހުޅުދޫގައި ބަޔަކު ވެލާ ފެޅި ކަމަށް ތުހުމަތުކުރެވޭ މައްސަލައެއް ފުލުހުންނަށް ހުށަހަޅާފައިވަނީ 2026 އޭޕްރީލް 11 ވީ ބުރާސްފަތި ދުވަހުގެ ހެނދުނު 11:18 އެހައިކަންހާއިރު ކަމަށެވެ.

މި މައްސަލަ ފުލުހުންނަށް ރިޕޯޓުކޮށްފައިވަނީ ބ. އަތޮޅު ބަޔޮސްފިއާ ރިޒާވް އޮފީހުގެ ފަރާތުންނެވެ.

މި ހާދިސާއާ ގުޅިގެން ބަލަންޖެހޭ ކަންކަން ބެލުމަށްފަހު، އެކަމުގައި ޝާމިލުވާ ފަރާތްތަކާ މެދު ގާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި ފުލުހުންގެ ތަހުގީގު ރިޕޯޓު މިހާރު ވަނީ އެންވަޔަރަންމަންޓަލް ރެގިއުލޭޓަރީ އޮތޯރިޓީއަށް ފޮނުވާފައެވެ.

ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ވެލާ ކަހަނބަކީ ހިމާޔަތްކުރެވިފައިވާ އެއްޗަކަށްވާއިރު، މިފަދަ އަމަލުތައް ހިންގާ ފަރާތްތަކާމެދު ބޮޑެތި ޖޫރިމަނާތަކެއް އަންނަނީ ކަނޑައަޅަމުންނެވެ.

ބ. އަތޮޅަކީ ބަޔޮސްފިއާ ރިޒާވެއްގެ ގޮތުގައި ކަނޑައަޅާފައިވާ ސަރަހައްދަކަށް ވުމާއެކު، އެ ސަރަހައްދުގެ ދިރުންތަކަށް ގެއްލުންދޭ މައްސަލަތައް ކަމާބެހޭ އިދާރާތަކުން ވަރަށް ސީރިއަސްކޮށް ބަލައެވެ.

އެގޮތުން 2023 ވަނަ އަހަރު ވެސް ކެންދޫގެ ހަތް މީހަކު އެ އަތޮޅުގައި އޮންނަ ފަޅުރަށެއް ކަމަށްވާ ކެޔޮދޫގައި ވެލާ ފެޅި މައްސަލައެއް ފެންމަތިވެ، ކޮންމެ މީހަކަށް 198،000ރ. ގެ ޖޫރިމަނާއެއް ފުރަތަމަ ކުރި އެވެ.

ނަމަވެސް، އެ އަދަދު މާ ބޮޑު ކަމަށް ބުނެ ޖޫރިމަނާ ދައްކަން އެ މީހުން ދެކޮޅު ހެދުމުން ކޮންމެ މީހަކު ދައްކަން ޖެހޭ ޖޫރިމަނާގެ ފައިސާގެ އަދަދު 33،000ރ. އަށް ކުޑަކޮށްދިނެވެ.