ތިލަމާލެ ބްރިޖްގެ މަޝްރޫޢުގެ ދަށުން މިހާރު ނުނިމިވަނީ 28.4 އިންސައްތަ މަސައްކަތްކަމަށް މިނިސްޓަރ އޮފް އިންފްރާސްޓްރަކްޗަރ ހައުސިންގ އެންޑް އަރބަން ޑިވެލޮޕްމަންޓުން ބުނެފިއެވެ.
މި މަޝްރޫޢުގެ މަސައްކަތް މިހާރު ގޮސްފައިވާ ހިސާބާ ގުޅޭގޮތުން އިންފްރާސްޓްރަކްޗަރ މިނިސްޓްރީން ބުނީ ތިލަމާލެ ބްރިޖް ތަރައްޤީކުރުމުގެ މަޝްރޫޢުގެ މިހާހިސާބަށް އާއިރު، 71.6 އިންސައްތަ މަސައްކަތް ނިމިފައިވާކަމަށެވެ. މައިގަނޑު ގޮތެއްގައި ބްރިޖްގެ މިހާރު ކުރިއަށްދަނީ، ބްރިކް ޑެކްއަށް ބޭނުންވާ ސެގްމަންޓްތައް ކާސްޓްކުރުމާއި، ސެގްމަންޓްތައް އިންސްޓޯލްކުރުމުގެ މަސައްކަތައްކަމަށް މިނިސްޓްރީން ބުންޏެވެ.
މިނިސްޓްރީން ބުނީ ބްރިޖް ޑެކަށް ބޭނުންވާ 1222 ސެގްމަންޓުގެ ތެރެއިން މިހާތަނަށް %84 ސެގްމަންޓްސް ކާސްޓްކޮށް ނިމިފައިވާކަމަށެވެ. އަދި %54 ސެގްމަންޓްސް އިންސްޓޯލްކޮށް ވަނީ ނިމިފައިވާކަމަށްވެސް މިނިސްޓްރީން ބުންޏެވެ. ބްރިޖާ ގުޅޭ އެހެނިހެން މަސައްކަތްތަކަށް ބަލާއިރު، ގުޅިފަޅުގައި މިވަގުތު ބްރިޖާއި ގުޅިގެން ހެދުމަށް ހަމަޖެހިފައިވާ މަގުގެ މަސައްކަތް ކުރިއަށްދާއިރު، ތިލަފުށީގައި މިވަގުތު ކުރިއަށްދަނީ ބްރިޖާއި ގުޅިގެން ތިލަފުށީގައި ޖެހުމަށް ހަމަޖެހިފައިވާ ރިވެޓްމަންޓް ޖެހުމުގެ މަސައްކަތާއި ކަލްވާރޓްސް ހަރުކުރުމުގެ މަސައްކަތްކަމަށްވެސް މިނިސްޓްރީން ބުންޏެވެ.
ތިލަމާލެ ބްރިޖް މަޝްރޫޢުއަށް ބަލާއިރު، ބްރިޖް މަޝްރޫޢު މުޅިން ނިންމާލެވޭ ވަރުވާނީ، އަންނަ އަހަރުކަމަށް މިނިސްޓަރު ޑރ.އަބްދުﷲ މުއްތަލިބް ވަނީ ވިދާޅުވެފައެވެ.
މި މަޝްރޫއުގައި މާލެއިން ގުޅީފަޅަށް އަޅާ ބްރިޖުގެ މަސައްކަތް ނިމޭ ތާރީހަކަށް މީގެ ކުރިން ދީފައި އޮތީ 31 މާޗް 2026 އެވެ. އަދި ގުޅީފަޅުން ތިލަފުއްޓަށް އެ މަސައްކަތް ނިމޭނެ ތާރީހަކަށް ދީފައި އޮތީ 30 ސެޕްޓެމްބަރ 2026 އެވެ.
Advertisement
This content is created and paid for by advertisers and does not involve Voice Journalists
