އިނގިރޭސި ޕްރިމިއާލީގްގައި މިރޭ މެންޗެސްޓަރ ސިޓީ އަތުން އާސެނަލް ބަލިވެ، ލީގް ހޯދުމުގެ އަމިއްލަ ބާރު އެޓީމަށް ގެއްލިއްޖެއެވެ.

ލީގްގައި މިރޭ މެންޗެސްޓަރ ސިޓީ އާއި އާސެނަލް ކުޅުނުމެޗް ސިޓީ ކާމިޔާބުކުރީ 1-2 ގެ ނަތީޖާއަކުންނެވެ. މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީވެސް ސިޓީއެވެ. އެއީ މެޗްގެ 16 ވަނަ މިނެޓް ތެރޭގައި ޗެރްކީ ކާމިޔާބުކޮށްދިން ލަނޑުންނެވެ. ސިޓީން ލީޑް ނެގިތާ ހަމަޖެހިނުލެވި އުޅެނިކޮށް ގޯލް ކީޕަރު ޑޮންނަރުއްމާއަށް ހެދުނު ގޯހެއްގެ ފައިދާ ނަގައި އާސެނަލްގެ ހާވަރޓްޒް ވަނީ ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ.

މެޗްގެ ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމް އެއްވަރުވެގެންނެވެ. ފުރަތަމަ ހާފް ކުޅެން ފަށައި ސިޓީން ވަނީ ކުޅުން ރަނގަޅުކޮށް 65 ވަނަ މިނެޓް ތެރޭގައި ދެވަނަ ފަހަރަށް ލީޑް ނަގާފައެވެ. މި ލަނޑު ކާމިޔާބުކޮށްދިނީ ހާލާންޑެވެ.

މެޗްގައި މޮޅަށްކުޅެ ގިނަ ހަމަލާތައް އުފައްދާފައިވަނީ ސިޓީންނެވެ. މެޗުން މޮޅުނުވިއެއްކަމަކު އާސެނަލުން ވަނީ އެންމެ ފަހު ވަގުތުވެސް ގޯލެއް ޖަހައި މެޗްގެ ނަތީޖާ ހަމަހަމަކުރުމަށް މަސައްކަތްކޮށްފައެވެ. މިގޮތުން މެޗްގެ ފަހުވަގުތުކޮޅުގެ ތެރޭގައި ހާވަރޓްޒް ބޮލުން ނުރައްކާތެރި ހަމަލާއެއް ފޮނުވާލާފައެވެ. ނަމަވެސް އެ ހަމަލާ ވަރަށް ހުށިޔާރުކަމާއެކު ސިޓީގެ ކީޕަރުވަނީ ދިފާއުކޮށްފައެވެ.

މެޗުން ސިޓީ މޮޅުވެ އާސެނަލަށް ތިން ޕޮއިންޓް ގެއްލުމުން އެޓީމަށް ވަނީ ލީގް ހޯދުމުގެ އަމިއްލަ ބާރު ގެއްލިފައެވެ. އިނގިރޭސި ޕްރިމިއާ ލީގް ޕޮއިންޓް ތާވަލް މިހާރު އޮތްގޮތަށް ބަލާއިރު، އަދިވެސް ތާވަލްގެ އެއްވަނާގައި އޮތީ އާސެނަލެވެ. ނަމަވެސް އެއީ ސިޓީއަށްވުރެ އެއްމެޗް އިތުރަށް ކުޅެގެންނެވެ. ލީގްގައި މިހާތަނަށް ކުޅުނު 33 މެޗުން އާސެނަލަށް 70 ޕޮއިންޓް ލިބިފައިވާއިރު، 32 މެޗުން ސިޓީއަށް ލިބިފައިވަނީ 67 ޕޮއިންޓެވެ. 

ޕްރިމިއާ ލީގް އެންމެފަހުން ބޯންމައުތާ ދެކޮޅަށް އަމިއްލަ ދަނޑުގައި ކުޅުނުމެޗުން އާސެނަލް ބަލިވިއިރު، މިފަހަކަށް އައިސް އެޓީމް ކުޅޭ މެޗްތަކުން އެދެވޭ ނަތީޖާއެއް ނެރެވިފަ ނުވާކަން ފާހަގަކޮށްލެވެއެވެ. 

އިނގިރޭސި ޕްރިމިއާ ލީގްގައި މިރޭ ލިވަޕޫލާ އެވަތަން ބައްދަލުކުރިމެޗް 2-1 ގެ ނަތީޖާއަކުން ކާމިޔާބުކުރީ ލިވަޕޫލެވެ. މިމެޗުން ލިވަޕޫލް މޮޅުވުމާއެކު އެޓީމް ވަނީ އަންނަ ސީޒަނުގެ ޗެމްޕިއަންސްލީގުން ޖާގައެއް ހޯދުމުގެ އުއްމީދު އާކޮށްފައެވެ.