ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމަށް ކުރީގެ ތިން ވަޒީރުން އައްޔަނު ކުރައްވައިފި އެވެ.
އެމްބެސެޑާ އެޓް ލާޖުގެ މަގާމަށް އައްޔަނުކުރައްވާފައި ވަނީ މި ސަރުކާރުގައި ސިޓީސްތަކާއި އިދާރީ ދާއިރާތަކާއި ގުޅޭ މިނިސްޓްރީގެ މިނިސްޓަރުކަން ކުރެއްވި އާދަމް ޝަރީފް އުމަރާއި ޓޫރިޒަމް މިނިސްޓަރުކަން ކުރެއްވި ތޯރިގް އިބްރާހިމް އާއި ރައީސް ވަހީދުގެ ސަރުކާރުގައި ބަންޑާރަ ނާއިބުކަން ކުރެއްވި ފާތިމަތު ދިޔާނާ ސައީދު އެވެ.
އެކަން ސަރުކާރުގެ އިސް ތަރުޖަމާން މުހައްމަދު ހުސައިން ޝަރީފް ވަނީ ވޮއިސްއަށް ޔަގީންކޮށް ދެއްވާފަ އެވެ. ތަރުޖަމާން ވިދާޅުވީ މި ތިން ބޭފުޅުން އެ މަގާމުތަކަށް އައްޔަނު ކުރައްވާފައިވަނީ މިދިޔަ ހަފްތާގައި ކަމަށެވެ. ތިން ބޭފުޅުން އައްޔަނު ކުރެއްވީ ވަކިވަކީން އެކި ދުވަސްމަތީންނެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ކެބިނެޓަށް ބޮޑު ބަދަލެއް ގެންނަވާފަ އެވެ. އެ ބަދަލު ގެންނެވުމަށް ފުރުސަތު ދެއްވުމުގެ ކުރީން 10 ވަޒީރަކު އެއް ދުވަހާއި އިސްތިއުފާ ދެއްވި އެވެ. އޭގެ ތެރޭގައި އާދަމް ޝަރީފް އުމަރާއި ތޯރިގް އިބްރާހިމް ހިމެނިވަޑައިގަންނަވަ އެވެ.
ދިޔާނާ ސައީދަކީ ސަރުކާރުގެ ސިޔާސަތުތަކަށް ތާއީދު ކުރައްވާ ވަރަށް ބޮޑަށް ވާހަކަފުޅު ދައްކަވާ ބޭފުޅެކެވެ. ހާއްސަ ކޮށްް އެންމެ ފަހުން އޮތް ރައްޔިތުންގެ ފެންނަ ނުފެންނަ ވޯޓްގައި އެކަމަނާ ވަނީ ސަރުކާރުގެ ސްޓޭންޑް ވަރަށް ބޮޑަށް ދިފާއު ކުރައްވާ އެކަމުގެ ފައިދާތައް ބަޔާންކޮށް ދެއްވާފަ އެވެ.
ދިޔާނާ އަކީ ރާއްޖެ މި ފަހުން ދުށް އެންމެ މޮޅެތި ގާނޫނީ ވަކީލުންގެ ތެރޭގައި ހިމެނިވަަޑައިގަންނަވާ ބޭފުޅެކެވެ.
Advertisement
This content is created and paid for by advertisers and does not involve Voice Journalists
