ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމަށް ކުރީގެ ތިން ވަޒީރުން އައްޔަނު ކުރެއްވުމަކީ އަލަށް މަގާމުތަކެއް އުފެއްދެވުން ނޫން ކަމުގައި ވިދާޅުވެ އެކަން ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާން މުހައްމަދު ހުސައިން ޝަރީފް ސާފުކޮށް ދެއްވައިފި އެވެ.
ތަރުޖަމާން މިއަދު ނެރުއްވި ބަޔާނެއްގައި ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިނިސްޓްރީ އޮފް ފޮރިން އެފެއާޒްގެ އެމްބެސެޑަރ އެޓް ލާޖްކަމުގެ މަގާމަށް ތިން ބޭފުޅަކު އައްޔަނު ކުރައްވާފައިވާ ކަމަށެވެ. މިގޮތުން މިފަހުން އެ މަގާމަށް ޢައްޔަނު ކުރެވުނު ބޭފުޅުންނަކީ އާދަމް ޝަރީފު ޢުމަރާއި، ޠާރިޤު އިބްރާހީމް އަދި އަލްއުސްތާޛާ ފާޠިމަތު ދިޔާނާ ސަޢީދު ކަމުގައި ވިދާޅުވި އެވެ.
އެމްބެސެޑަރ އެޓް ލާޖްގެ މަގާމަށް އައްޔަނު ކުރެއްވީ ހުސްވެފައިވާ ސަފީރުންގެ މަގާމުތަކަށް އައްޔަނު ކުރެއްވުމަށް ކަނޑައެޅިފައިވާ ބޭފުޅުންނެވެ. އެއީ އަލަށް އުފައްދަވާ މަގާމުތަކެއް ނޫން ކަމުގައި ތަރުޖަމާން ވިދާޅުވި އެވެ.
ތަރުޖަމާން މިފަދަ ބަޔާނެއް ނެރުއްވީ ބައެއް މީޑިއާތަކަށް މިކަން ސާފުވެފައި ނުވާތީ އެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ކެބިނެޓަށް ބޮޑު ބަދަލެއް ގެންނަވާފަ އެވެ. އެ ބަދަލު ގެންނެވުމަށް ފުރުސަތު ދެއްވުމުގެ ކުރީން 10 ވަޒީރަކު އެއް ދުވަހާއި އިސްތިއުފާ ދެއްވި އެވެ. އޭގެ ތެރޭގައި އާދަމް ޝަރީފް އުމަރާއި ތޯރިގް އިބްރާހިމް ހިމެނިވަޑައިގަންނަވަ އެވެ.
ދިޔާނާ ސައީދަކީ ސަރުކާރުގެ ސިޔާސަތުތަކަށް ތާއީދު ކުރައްވާ ވަރަށް ބޮޑަށް ވާހަކަފުޅު ދައްކަވާ ބޭފުޅެކެވެ. ހާއްސަ ކޮށްް އެންމެ ފަހުން އޮތް ރައްޔިތުންގެ ފެންނަ ނުފެންނަ ވޯޓްގައި އެކަމަނާ ވަނީ ސަރުކާރުގެ ސްޓޭންޑް ވަރަށް ބޮޑަށް ދިފާއު ކުރައްވާ އެކަމުގެ ފައިދާތައް ބަޔާންކޮށް ދެއްވާފަ އެވެ.
ދިޔާނާ އަކީ ރާއްޖެ މި ފަހުން ދުށް އެންމެ މޮޅެތި ގާނޫނީ ވަކީލުންގެ ތެރޭގައި ހިމެނިވަަޑައިގަންނަވާ ބޭފުޅެކެވެ.
Advertisement
This content is created and paid for by advertisers and does not involve Voice Journalists
