ސިއްހީ ގިނަ ފައިދާތަކެއް އެކުލެވޭ މުރަނގަ އޮށަކީ ބޯފެނުގައި ހުންނަ މައިކްރޯޕްލާސްޓިކް ސާފުކޮށްދޭ ގަހެއްކަން އާ ދިރާސާއަކުން ދައްކައިފިއެވެ.

ބްރެޒިލް އަދި އިނގިރޭސިވިލާތުގެ ސައިންސްވެރިން ގުޅިގެން ކުރި މި ދިރާސާ، މިއަހަރުގެ އޭޕްރިލް މަހު ވަނީ ޝާއިޢުކޮށްފައެވެ. މި ދިރާސާއިން ހާމަވިގޮތުގައި، މުރަނގަ ގަހުގެ އޮށުން ތައްޔާރުކުރާ މާއްދާތަކަކީ، ފެން ސާފުކުރުމަށް މިހާރު ބޭނުންކުރާ ކެމިކަލްތަކާ އެއްވަރުގެ ނަތީޖާއެއް ނެރެދޭ އެއްޗެކެވެ.

މުރިންގާ ގަހަކީ މީގެ އެތައް ހާސް އަހަރެއް ކުރިން، ގަދީމީ ޔޫނާނީންނާއި، ރޯމަނުން އަދި މިޞްރުގެ މީހުންވެސް ފެން ސާފުކުރުމަށް ބޭނުންކޮށްފައިވާ ގަހެކެވެ. މި ދިރާސާގެ މުސައްނިފު، ސައޮ ޕައޮލޯ ސްޓޭޓް ޔުނިވަރސިޓީގެ ޕްރޮފެސަރ އެޑްރިއާނޯ ގޮންސަލްވޭސް ޑޮސް ރެއިސް ވިދާޅުވި ގޮތުގައި، އޭނާގެ ޓީމުން ފާއިތުވި 10 އަހަރު ދުވަހު އައީ މުރަނގަ ގަހުގެ އޮށުގެ "ކޯގިއުލަންޓް" (ފެނުގައި ހުންނަ ކުދި މާއްދާތައް އެކަތިގަނޑަކަށް ހަދައިދޭ) ސިފައާ ގުޅޭގޮތުން ދިރާސާ ކުރަމުންނެވެ. ބޯފެނުގައި މައިކްރޯޕްލާސްޓިކް އިތުރުވަމުންދާތީ، އެކަމަށް އޮތް ހައްލެއްގެ ގޮތުން މި ދިރާސާ ކުރުމަށް ސައިންސްވެރިން ނިންމީއެވެ.

މައިކްރޯޕްލާސްޓިކަކީ އިންސާނާގެ އިސްތަށީގެ ބޯމިނަށްވުރެވެސް މާ ކުދި، ޕްލާސްޓިކްގެ އެތިކޮޅުތަކެކެވެ. 2024 ވަނަ އަހަރުގެ ދިރާސާއަކުން ދައްކާގޮތުގައި ދުނިޔޭގެ ބޯފެނުގެ 83 އިންސައްތައިގައި މި ނުރައްކާތެރި މާއްދާ އެކުލެވިގެންވެއެވެ. މިއީ އިންސާނާގެ ސިކުނޑިއާއި، ލޭދައުރުކުރާ ނިޒާމަށްވެސް ވަންނަ އެއްޗެކެވެ. ޖަނަވާރުންގެ މައްޗަށް ކުރި ދިރާސާތަކުން ދައްކާގޮތުގައި، މީގެ ސަބަބުން ދަރިމައިވުމުގެ މައްސަލަތަކާއި ހޯރމޯންތަކަށް ބަދަލު އައުން ފަދަ ނުރައްކާތައް ކުރިމަތިވެއެވެ.

ސައިންސްވެރިން ކުރި ތަހުލީލުތަކުން ދެއްކި ގޮތުގައި، މުރަނގަ އޮށުގެ ސަބަބުން ފެނުގައި ހުންނަ ޕީ.ވީ.ސީ މައިކްރޯޕްލާސްޓިކްގެ 98.5 އިންސައްތަ ސާފުކޮށްދެއެވެ. މިއީ މިހާރު ފެން ސާފުކުރުމަށް ބޭނުންކުރާ ކެމިކަލެއް ކަމަށްވާ "އެލްމިނިއަމް ސަލްފޭޓް" އާ އެއްވަރުގެ ނަތީޖާއެކެވެ.

ނަމަވެސް، އެލްމިނިއަމް ފަދަ ކެމިކަލްތަކަކީ ގިނަ މިންވަރަކަށް ބޭނުންކޮށްފިނަމަ ނާރުގެ ބަލިތަކަށް މަގުފަހިވާ ވިހަ މާއްދާއަކަށް ވާއިރު، މުރަނގަ އޮށަކީ ތިމާވެއްޓާ ރައްޓެހި، އަދި އަމިއްލައަށް ފީވެގެންދާ ރައްކާތެރި އެއްޗެކެވެ.

ޔުނިވަރސިޓީ އޮފް ނިއު މެކްސިކޯގެ ޕްރޮފެސަރ މެތިއު ކެމްޕެން ވިދާޅުވި ގޮތުގައި، މި ހޯދުމުގެ ސަބަބުން އެލްމިނިއަމް ހޯދުމަށް ކުރާ މައިނިންގް މަސައްކަތްތައް މަދުވެ، ތިމާވެއްޓަށް ލިބޭ ގެއްލުން ކުޑަވާނެއެވެ.

އެހެންނަމަވެސް، ބައެއް ގޮންޖެހުންތައްވެސް ހުރިކަން ސައިންސްވެރިން ފާހަގަކުރެއެވެ. އެގޮތުން އެންމެ މުރަނގަ އޮށަކުން ސާފުކުރެވެނީ 10 ލިޓަރުގެ ފެނެވެ. އެހެންކަމުން ބޮޑެތި ސިޓީތަކުގެ ފެން ސާފުކުރުމަށްޓަކައި ގިނަ އަދަދެއްގެ އޮށް ބޭނުންވާނެއެވެ. މި ވަގުތަށް މި އުކުޅު އެންމެ ފައިދާހުރި ގޮތެއްގައި ބޭނުންކުރެވޭނީ ކުދި އާބާދީތަކުގައާއި، ކެމިކަލް ހޯދަން އުނދަގޫ ސަރަހައްދުތަކުގައެވެ.

ކުރިމަގުގައި މި މަސައްކަތް އިތުރަށް ފުޅާކޮށް، އެހެން ބާވަތްތަކުގެ ޕްލާސްޓިކާއި ނެނޯޕްލާސްޓިކް ސާފުކުރުމުގައި މުރަނގަ އޮށުގެ ދައުރާ ގުޅޭގޮތުން އިތުރު ދިރާސާތައް ކުރުމަށް ސައިންސްވެރިން ވަނީ ނިންމާފައެވެ. އިންސާނުންނަށް މައިކްރޯޕްލާސްޓިކްގެ ސަބަބުން ކުރިމަތިވާ ނުރައްކާތައް އިތުރުވަމުންދާ މި ދަނޑިވަޅުގައި، މިއީ ވަރަށް މުހިންމު ހޯދުމެއްގެ ގޮތުގައި ސައިންސްވެރިން ސިފަކުރެއެވެ.