ރާއްޖެއަށް އުދުހުންތައް ބާއްވަމުން އަންނަ ބޮޑެތި ބައެއް އެއާލައިންތަކުން މިއަހަރުގެ ކުރިއަށްއޮތްތަނުގައި ރާއްޖެއަށް ކުރާ ދަތުރުތައް އިތުރުކުރުމަށް ނިންމާފައިވާކަމަށް ފަތުރުވެރިކަމާއި މަދަނީ ވައިގެ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
މިނިސްޓަރު މެދުއިރުމައްޗާއި ގަލްފުގެ ހަމަނުޖެހުންތަކާ ގުޅިގެން ރާއްޖެއަށް ކުރިމަތިވާ ގޮންޖެހުންތަކުން އަރައިގަތުމަށް ކުރައްވާ މަސައްކަތްތަކުގެ މައުލޫމާތު ދިނުމަށް އެންމެފަހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އަމީން ވިދާޅުވީ، މިހާރު ކުރިމަތިވެފައި އޮތް ހާލަތުން އަރައިގަތުމަށް ސަރުކާރުގެ ކަމާބެހޭ މުއައްސަސާތަކާއި ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއެކު ގުޅިގެން ގިނަ މަސައްކަތްތަކެއް ކުރަމުން އަންނަ ކަމަށެވެ.
އެގޮތުން ޓޫރިސްޓް ރިސޯޓްތައް ހިއްސާވާ ޖަމިއްޔާ މަތީ އާއި ގެސްޓްހައުސް އެސޯސިއޭޝަންސް މިފަދަ ހުރިހާ ސްޓޭކްހޯލްޑަރުންގެ އެހީތެރިކަމާއި އަދި ރާއްޖެ އަންނަ އެއާލައިންތަކާ އެކު މަސައްކަތްކޮށްގެން އެދެވޭފަދަ ހެޔޮ ބަދަލުތަކެއް ގެނެވޭތޯ މަސައްކަތް ކުރަމުންދާކަމަށް އަމީން ވިދާޅުވިއެވެ.
މިނިސްޓަރު ވިދާޅުވީ، ޤަތަރު އެއާވޭސް އަދި އެމިރޭޓްސް އެއާލައިނުން ކުރިއަށްއޮތްތަނުގައި ރާއްޖެއަށް ބާއްވާ ފްލައިޓްތަކުގެ އަދަދު އިތުރުކުރުމަށް ނިންމާފައިވާކަމަށެވެ. އެގޮތުން އެ ދެ އެއާލައިނުން ޖޫންމަހުން ފެށިގެން ހަފްތާއަކު ތިން ފްލައިޓަށް އިތުރުކުރުމަށް ނިންމިއިރު، ބްރިޓީޝް އެއާވޭސްއިންވެސް ރާއްޖެއަށް ބާއްވަމުން އަންނަ ދަތުރުތައް އިތުރުކުރުމަށް ނިންމާފައިވާކަން މިނިސްޓަރުގެ ވާހަކާގައި ފާހަގަކުރެއްވިއެވެ.
ތަފާސްހިސާބުތައް ދައްކަނީ ޓޫރިޒަމްގެ ލޯ ސީޒަން ނިމިގެންދާއިރު އަންނަ ޓޫރިސްޓުންގެ އަދަދު އިތުރުވާވާނޭކަމަށް
ޓޫރިޒަމާ ސިވިލްއޭވިއޭޝަން މިނިސްޓަރު އަމީން
އެމެރިކާ އަދި އިސްރާއީލުން އިސްވެ އީރާނަށް ދޭންފެށި ހަމަލާތަކާ ގުޅިގެން މިދިޔަ ދުވަސްތަކުގައި މެދުއިރުމަތީގެ ހާލަތަށް އައި ނުތަނަވަސްކަމާއެކު ރާއްޖެއަށް އުދުހުންތައް ތާވަލްކޮށްފައި އޮތް ގިނަ އަދަދެއްގެ ފްލައިޓްތައް ވަނީ ކެންސަލްކޮށްފައެވެ.
އެގޮތުން ހަނގުރާމަފެށިގެންގޮސް ފުރަތަމަ 45 ދުވަހުގެ ތެރޭގައި އެކަނިވެސް ރާއްޖެ އަންނަން ތާވަލްކޮށްފައި އޮތް 600 އަށްވުރެ ގިނަ ފްލައިޓް ވަނީ ކެންސަލްވެފައެވެ. މި ފްލައިޓްތައް ކެންސަލްވުމާއެކު ރާއްޖެ އަންނަ ފަތުރުވެރިންގެ އަދަދު ދަށްވި ނަމަވެސް ބައެއް އެއާލައިންތަކުން ދަތުރުތައް އަލުން ފަށައި، މިހާރު ޓޫރިސްޓުން އަންނަ އަދަދަު ދަނީ މަޑުމަޑުން އިތުރުވަމުންކަމަށް ކަމާ ބެހޭ އިދާރާތަކުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
