ޖަވާބުދާރީވުމުގެ ބަދަލުގައި ސަރުކާރުން މިއަދު އިސްކަންދެނީ ބިރުވެރިކަން ފެތުރުމަށްކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.
ބައިނަލްއަޤްވާމީ ގޮތުން މިއަދު ފާހަގަކުރަމުންދާ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓްގައި ޝާހިދު ވިދާޅުވީ، ސަރުކާރުގެ އަމަލުތަކުގެ ސަބަބުން މިއަދު ރާއްޖޭގައި އޮތް ނޫސްވެރިކަމުގެ މިނިވަންކަން ފަހަތަށް ސޮއްސާލައިފިކަމަށެވެ. ދުނިޔޭގެ ނޫސްވެރިކަމުގެ މިނިވަންކަމުގެ ދުވަސް މިއަދު ފާހަގަކުރަމުންދާއިރު، ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ 108 ވަނާގައި އޮތުމަކީ ސަރުކާރުން ހާމަކަން ބޮޑު ސިޔާސަތުތަކުގެ ބަދަލުގައި ބިރުދެއްކުމުގެ އުސޫލު އިސްކުރަމުންދާ ކަމުގެ ހެއްކެއްކަމަށް ޝާހިދު ވިދާޅުވިއެވެ.
އެގޮތުން މީޑިއާގެ މިނިވަންކަމަށް ހުރަސްއެޅޭ ފަދަ ގާނޫނުތައް ހެދުމާއި، ނޫސް އިދާރާތަކަށް ފުލުހުން ފޮނުވައިގެން ހިންގާ އަމަލުތަކުން އެނގިގެންދަނީ، މި ސަރުކާރުން ޖަވާބުދާރީވުމުގެ ބަދަލުގައި ބިރުވެރިކަން ފެތުރުމަށް އިސްކަންދޭ މިންވަރުކަން ކަމަށް ޝާހިދު ފާހަގަކުރެއްވިއެވެ.
ޝާހިދު ވަނީ ނޫސްވެރިންނަށް ބިރުދެއްކުމާއި، އެކި ގޮތްގޮތުން ނޫސްވެރިންނަށް ގޯނާކުރުމާއި، އެމީހުންގެ މަސައްކަތް ޖިނާއީ ކުށެއްގެ ގޮތުގައި ބަލައިގަތުމަށް ސަރުކާރުން ކުރަމުންގެންދާ ކަންކަން ވަގުތުން ހުއްޓާލުމަށް ގޮވާލާފައެވެ.
ކޮންމެ އަހަރެއްގެވެސް މެއިމަހުގެ ތިންވަނަ ދުވަހަކީ ބައިނަލްއަޤްވާމީގޮތުން ފާހަގަކުރާ ނޫސްވެރިކަމުގެ މިނިވަންކަމުގެ ދުވަހެވެ.
Advertisement
This content is created and paid for by advertisers and does not involve Voice Journalists
