އިނގިރޭސި ޕްރިމިއާ ލީގްގައި ރޭ މެންޗެސްޓަރ ސިޓީ އާއި އެވަތަން ބައްދަލުކުރި މެޗް އެއްވަރުވެ، ލީގް ހޯދުމަށް ސިޓީއަށް އިތުރު އިންތިޒާރެއް ކުރަންޖެހިއްޖެއެވެ.

ލީގްގައި މެންޗެސްޓަރ ސިޓީ އާއި އެވަޓަން ބައްދަލުކުރިމެޗް ނިމުނީ 3-3 ގެ ނަތީޖާއަކުންނެވެ. މެންޗެސްޓަރ ސިޓީން މޮޅަށް ކުޅުނު މިމެޗްގައި އެންމެ ފުރަތަމަ ލަނޑެއް ޖަހައި ކުރި ހޯދާފައިވަނީވެސް އެޓީމުންނެވެ. އެއީ ފުރަތަމަ ހާފްގެ 43 ވަނަ މިނެޓް ތެރޭގައި ޖެރެޑީ ޑޯކޫ ޖަހައިދިން ލަނޑުންނެވެ. މި ލަނޑާއެކު ފުރަތަމަ ހާފް ނިމުނީ ސިޓީ ކުރީގައި އޮވެގެންނެވެ.

ދެވަނަ ހާފްގައި އެވަޓަނުން ވަނީ ކުޅުން ރަނަގޅުކޮށް 68 ވަނަ މިނެޓް ތެރޭގައި މެޗް އެއްވަރުކޮށްފައެވެ. މި ލަނޑު ކާމިޔާބުކޮށްދިނީ، ތިއާނޯ ބެރީ އެވެ. އޭގެ ހަތަރު މިނެޓްފަހުން ޖޭކް އޯބްރެއިން ލަނޑެއް ޖަހައި ފުރަތަމަ ފަހަރަށް އެވަޓަންއަށް ލީޑް ނަގައިދިންއިރު، ތިއާނޯ ބެރީ ވަނީ 81 ވަނަ މިނެޓް ތެރޭގައި ލަނޑެއް ޖަހައި ސިޓީ ހާސްކަމުގެ ތެރެއަށް ވައްޓާލާފައެވެ. 

ސިޓީން ލަނޑެއް ޖެހުމަށް ކުރަމުންދިޔަ މަސައްކަތަށް ކާމިޔާބުވީ، 83 ވަނަ މިނެޓް ތެރޭގައި އިތުބާރު ފޯވަދް ހާލާންޑް ކާމިޔާބުކޮށްދިން ލަނޑުންނެވެ. މެޗުން ބަލިނުވެ ސިޓީ ސަލާމަތްކޮށްދިނީ، ޑޯކޫއެވެ.

މެޗަށްފަހު ވާހަކަދައްކަމުން މެންޗެސްޓަރ ސިޓީގެ ކޯޗް ޕެޕް ގާޑިއޯލާ ބުނީ، ބަލިވުމަށްވުރެ މިގޮތްވެސް ރަނގަޅުކަމަށާއި، ލީގް ލިބެން އޮތީ އިންތިޒާރުތަކެއް ކޮށްގެންކަމަށެވެ. 

ސިޓީ މެޗް އެއްވަރުވުމުން އާސެނަލަށް ވަނީ ވަގުތީގޮތުން ފަސް ޕޮއިންޓާއެކު ތާވަލްގެ އެއްވަނަ ލިބިފައެވެ. ޕޮއިންޓް ތާވަލް މިހާރު އޮތްގޮތުން ދެން ސިޓީއަށް ލީގް ލިބެން އޮތީ އެންމެ މެޗަކުން ނަމަވެސް އާސެނަލް ބަލިވެގެންނެވެ. 

ޕްރިމިއާ ލީގް ޕޮއިންޓް ތާވަލް

ލީގްގައި އާސެނަލަށް ބާކީ ދެން އޮތީ ތިން މެޗެވެ. އެއީ އަންނަ އާދިއްތަ ދުވަހުގެ ރޭ ވެސްޓްހޭމް ޔުނައިޓެޑާ ދެކޮޅަށް ނިކުންނަ މެޗާއި، މެއިމަހުގެ 19 ވަނަ ދުވަހު ބާންލީ އާ ދެކޮޅަށް ނިކުންނަ މެޗްގެ އިތުރުން 24 ވަނަ ދުވަހު ކްރިސްޓަލް ޕެލަސްއާ ދެކޮޅަށް ނިކުންނަ މެޗެވެ.