ޖަރުމަނުވިލާތުގެ ބެޔާން މިއުނިކް ބަލިކޮށް ފްރާންސްގެ ޕީއެސްޖީ، ޔުއެފާ ޗެމްޕިއަންސްލީގް ފައިނަލަށް ދަތުރުކޮށްފިއެވެ.

ޗެމްޕިއަންސްލީގް ފައިނަލުގެ ފަހު ޖާގަ، ޕީއެސްޖީން ކަށަވަރުކޮށްފައިވަނީ، ރޭ ސެމީފައިނަލުގެ ދެވަނަ ލެގްގައި ކުޅުނުމެޗް 1-1 ގެ ނަތީޖާއިން އެއްވަރުވިނަމަވެސް ދެ މެޗްގެ އެގްރިގޭޓް ނަތީޖާއިން ޕީއެސްޖީ ކުރިހޯދައިގެންނެވެ. ފުރަތަމަ ލެގްގައި ޕެރިހުގައި މި ދެޓީމް ކުޅުނު މެޗް ޕީއެސްޖީ ކާމިޔާބުކުރީ 5-4 ގެ ނަތީޖާއަކުންނެވެ.

ރޭގެ މެޗް ފަށައިގެން ވަރަށް ކުރީކޮޅު ޕީއެސްޖީން ވަނީ ލަނޑެއް ޖަހައި ލީޑް ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ، ތިން ވަނަ މިނެޓް ތެރޭގައި އޮސްމާން ޑެމްބެލޭ އެވެ. މެޗްގައި ގިނަ އަދަދެއްގެ ރީނދޫ ކާޑު ވަނީ ފެނިގެންގޮސްފައެވެ. މެޗްގައި ދެ ޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތައް ހޯދާފައެވެ. ފުރަތަމަ ހާފް ނިމުނީ 1-0 ގެ ނަތީޖާއިން ޕީއެސްޖީ ކުރީގައި އޮވެގެންނެވެ.

ދެވަނަ ހާފުގައި ޕީ.އެސް.ޖީ އިން ވަނީ ނުރައްކާތެރި ގިނަ ފުރުސަތުތަކެއް ތަނަވަސްކޮށްފައެވެ. ވަކިން ހާއްސަކޮށް ޑެސިރޭ ޑޫއޭ ފޮނުވާލި ހަމަލާތައް ފާހަގަކޮށްލެވެއެވެ. އެހެންނަމަވެސް، ބަޔާންގެ ގޯލްކީޕަރު މެނުއަލް ނޯޔާ ވަނީ ހުށިޔާރުކަމާއެކު އެ ހަމަލާތައް ދިފާއުކޮށްފައެވެ

ބެޔާނުން އެއްވަރުކުރި ލަނޑު އެޓީމަށް ކާމިޔާބުކޮށްދިނީ މެޗްގެ އިތުރުވަގުތުގެ ކުޅުމުގެ ތެރޭގައި ހަރީ ކޭންއެވެ. ފަހު ހާފްގައި ބެޔާނުން ވަނީ ކުޅުން ރަނަގޅުކޮށް ހަމަލާތައްވެސް ފަރުގަދަކޮށްފައެވެ. ނަމަވެސް މެޗް ނިމުނީ އެކެއް އެކެއްގެ ނަތީޖާއިން ދެޓީމް އެއްވަރުވެގެންނެވެ.

މުބާރާތުގެ ފައިނަލުގައި ޕީއެސްޖީ ނިކުންނާނީ އިނގިރޭސިވިލާތުގެ އާސެނަލާ ދެކޮޅަށެވެ. ޗެމްޕިއަންސްލީގް ފައިނަލް މެޗް އޮންނާނީ  އަންނަ މެއި މަހުގެ 30 ވާ ހޮނިހިރު ދުވަހު ހަންގޭރީގެ ބުޑަޕެސްޓްގައެވެ.