ކުރިއަށް އޮތް ރިޔާސީ އިންތިހާބު ބޮޑުކޮށް ކާމިޔާބުކޮށް ދެވަނަ ދައުރެއް ހޯއްދަވާނެ ފުރަތަމަ ރައީސަކަށް ވެވަޑައިގަންނަވާނީ ރައީސުލްޖުމްހޫރިއްޔާ މުޙައްމަދު މުޢިއްޒު ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ނިމިދިޔަ ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބުގައި އއ. ހިމަންދޫއިން ކޮންގްރެސް ޕާޓީއަށް ލިބުނު ކާމިޔާބީ ފާހަގަކުރުމަށް މިރޭ އެ ޕާޓީގެ މައި ޖަގަހާއި އޮތް ޖަލްސާގައި ވާހަކަ ދައްކަވަމުން އަބްދުއްރަހީމް ވަނީ އެމަނިކުފާނު ހުންނެވީ ރައީސް މުޢިއްޒުއާއެކު ގަދަކޮށް ކަމުގައި ވިދާޅުވެފަ އެވެ.
“އަޅުގަނޑުމެން މިތިބީ ރައީސް ޑރ. މުޙައްމަދު މުޢިއްޒާއެކު ރައްޔިތުންގެ ފަޅީގައި ގަދަކޮށް، ބޮޑުކޮށް ވަރުގަދައަށް،” އަބްދުއްރަހީމް ވިދާޅުވި އެވެ.
އަބްދުއްރަހީމް ޕީއެންސީގެ ޖަލްސާއެއްގައި ވާހަކަ މި ދެއްކެވީ ގިނަ ދުވަސްތަކެއްގެ ފަހުންނެވެ. އަބްދުއްރަހީމަކީ އެ ޕާޓީގެ ޗެއާޕާސަން ނަމަވެސް ޕާޓީގެ ހަރަކާތްތަކުން ފެންނަލެތް މަދެވެ. ލީޑާޝިޕުގެ ހަރަކާތްތަކުން ފެންނަލެއް މަދެވެ. އެކަހެރިކޮށްފައިވާ ކަމުގެ އަޑުތައް ވެސް ގަދަ އެވެ.
ނަމަވެސް ވަރަށް ޖޯޝުގައި ތަގުރީރު ކުރައްވަމުން އަބްދުއްރަހީމް ވަނީ ރައީސް މުޢިއްޒުގެ ދިފާއުގައި ބަސް ވިދާޅުވާނެ ކަމަށް ތަކުރާރުކޮށް ވިދާޅުވެފަ އެވެ. އަދި ވިދާޅުވީ މިއީ ރައީސް ޑރ. މުޢިއްޒު ދެވަނަ ދައުރަކަށް އިންތިހާބުކުރުމަށް ކަމަރު ބަންނަންވީ ވަގުތު ކަމަށެވެ.
އަބްދުއްރަހީމްގެ ވާހަކަފުޅުގައި ވަނީ ރައްޔިތުންގެ ފުރިހަމަ ތާއިދާއި ލޯތްބާއެކު ރިޔާސީ ދެވަނަ ދައުރެއް ކަށަވަރު ކުރައްވާނެ ފުރަތަމަ ބޭފުޅަކަށް ވެވަޑައިގަންނަވާނީ ރައީސް މުޢިއްޒު ކަމުގައި ވިދާޅުވެފަ އެވެ.
“އިރާދަކުރެއްވިއްޔާ ﷲ ސުބުޙާނަހޫވަތަޢާލާގެ ހެޔޮ ރަޙްމަތްފުޅުން 2028 ވަނަ އަހަރު މި ޤައުމުގައި ބޭއްވޭ ރިޔާސީ އިންތިޚާބު ބޮޑުތަނުން ކާމިޔާބު ކުރައްވާނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު. އެކަން ކުރާނީ ދިވެހިރައްޔިތުންގެ އިޙްތިރާމާއި ލޯބި ހޯދައިގެން. ތާއީދު ހޯދައިގެން،” އަބްދުއްރަހީމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
