އަދީބް މިނިވަންކުރި މައްސަލާގައި ކަންބޮޑުވުން ހުއްޓެއްކަމަކު އެކަމަށް މައާފަށް އެދެންޖެހޭނެކަމަށް ގަބޫލު ނުކުރާކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ތިން ރައީސުން ގުޅިގެން ރޭ ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހް ވަނީ އަދީބަށް މައާފް ދިން މައްސަލާގައި ވާހަކަދައްކަވާފައެވެ. އެމްއެމްޕީއާރުސީން ދައުލަތަށް ލިބެންޖެހޭ ފައިސާތައް ގެއްލުނު މައްސަލާގައި ބޮޑު އަދަބެއްގައި ހުންނެވި އަހުމަދު އަދީބަށް މައާފްދެއްވައި މިނިވަންކޮށްފައިވަނީ ރައީސް ސޯލިހް އެވެ.
އަދީބަށް މައާފްދީ މިނިވަންކުރި ކުރުމާ ގުޅޭގޮތުން ރައީސް ސޯލިހް ވިދާޅުވީ، އަދީބަށް ލުއިދިނީ ޤާނޫނާއި އިމުގެ ތެރެއިން ބަލަންޖެހޭ ކަންކަން ބެލުމަށްފަހުގައިކަމަށެވެ. ރައީސް ސޯލިހް ވިދާޅުވީ ޖަލުގައި ބަންދުކޮށްފައި ތިބޭ މީހުންނަށް ލުއި ހޯދުމަށްޓަކައި އެކަން ރައީސުލްޖުމްހޫރިއްޔާއަށް ހުށަހަޅާކަމަށެވެ. އެމަނިކްފާނުގެ ވެރިކަމުގެ ކުރިންވެސް އެކަންކަން އޮންނަނީ އެހެންކަމަށް ވިދާޅުވިއެވެ.
ރައީސް ސޯލިހް ވިދާޅުވީ، ކަހަލަ މައްސަލައެއް އައިމަ ޤާނޫނީގޮތުން އެއީ ކުރެވޭނެ ކަމެއްތޯ ބެކުމަށްފަހު އެކަން ކުރެވެންޏާމު މައާފް ދެމުންގެންދާަކަމަށެވެ. އަދީބަށް މައާފްދިނީވެސް ބަލަންޖެހޭ ކަންކަން ބެލުމަށް ފަހު ކަމަށާއި، އެކަމުގައި ބައެއް ފަރާތްތަކުން ކަންބޮޑުވުން ހުއްޓެއްކަމަކު މައާފަށް އެދެންޖެހޭނެކަމަށް ނުދެކޭކަމަށްވެސް ސޯލިހް ވިދާޅުވިއެވެެ.
އަޙްމަދު އަދީބުގެ މައްސަލާގަވެސް އަޅުގަނޑުމެން މަސައްކަތްކޮށްފަ ހުންނާނެ. އަޅުގަނޑު ކޮށްފަ ހުންނާނީ ޤާނޫނުގެ އިމުގެ ތެރެއިން. އެ ފުރަތަމަވެލީ އެ ޙުކުމުގެ ތެރެއިން، އެ ޙުކުމުގެ ތެރެއިން މީ އަދަބު ލުއިކޮށްދިނުމަށް ބޭނުންވާ ވަރަށް ތަންފީޛުކޮށްފަ އޮތްތޯ؟ ދެން އެއާ ގުޅި އެއަށްފަހުގައި ކަރެކްޝަންސުން އެ ކުށްވެރިއަކާ ދޭތެރޭގައި ދެކޭ ގޮތާ، އެމީހަކު ކުށަށް ލުއި ދިނުމަށް، މިނިވަން ކުރުމުގައި ކަމެއް ކުރެވޭނެ އެބޭތޯ. އެ ހުރިހާ އެއްޗެއްގެ އަލީގައި އަޅުގަނޑާ ހިސާބަށް އައި ލިޔުމުގައި އޮންނަނީ އަޙްމަދު އަދީބަށް ލުއި ދިނުމަށް
ރައީސް ސޯލިހް ވިދާޅުވިއެވެ
އަދީބަށް ލުއިދިން މައްސަލާގައި ވާހަކަދައްކަވަމުން ރައީސް ސޯލިހް ވިދާޅުވީ، ލުއި ދިނީ ހަމައެކަނި ޖިނާއީ މައްސަލަތަކަށް ބެލުމަށްފަހު އެކަނިކަމަށެވެ. މައްސަލާގެ މަދަނީ ބައި މިހާރުވެސް ކުރިއަށް ގެންދެވޭނޭ ކަމަށާއި، އެކަން މިހާރު ކުރިއަށް ނުދަނީ ކީއްވެތޯވެސް ސޯލިހް ސުވާލުކުރެއްވިއެވެ.
ރައީސް ސޯލިހު އަދީބަށް މައާފްދެއްވާފައިވަނީ، އެމްއެމްޕީއާރުސީގެ ކޮރަޕްޝަނުގެ މައްސަލަ ސާބިތުވެ 20 އަހަރުގެ ޖަލު ހުކުމެއް އިއްވާފައި ވަނިކޮށެވެ. އެ މައްސަލާގައި ހިމެނޭ އަދީބާއި ޒިޔަތަށް ރައީސް ސޯލިހް މައާފްދެއްވީ ޕެރޯލް ގާނޫނުގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ.
އަހުމަދު އަދީބަށް ދައުލަތުން ދައުވާ އުފުލާފައިވަނީ އެމްއެމްޕީއާރްސީގެ ތެރެއިން 2014 އަހަރުްނ ފެށިގެން 2015 ވަނަ އަހަރާއި ދެމެދު ޓޫރިޒަމް މިނިސްޓަރުކަމުގައި ހުންނަވައި ހިންގި ކޮރަޕްޝަނާއި މަނީ ލޯންޑްރިން މައްސަލަތަކާ ގުޅިގެންނެވެ. މި މައްސަލާގައި އޭރު ދައުލަތުގެ ޕްރޮސެކިއުޓާރ ޖެނެރަލް ހުސެއިމް ޝަމީމް ވިދާޅުވެފައިވަނީ، އަދީބަށް ގިނަ ދައުވާތަކެއް އުފުލޭއިރު އެ މައްސަލަތަކުން މުޅި ޖުމްލަ ޖަލު އަދަބު 800 އަހަރަށް އަރާނޭކަމަށެވެ.
Advertisement
This content is created and paid for by advertisers and does not involve Voice Journalists
