ދިވެހިރާއްޖޭގެ ދައުލަތުގެ އޮނިގަނޑަށާއި ހިންގުމަށް އައު ވިސްނުންތަކެއް ގެންނަންޖެހޭ ވަގުތު ޖެހިފައިވާ ކަމަށް އިދިކޮޅު އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.

ފައްޔާޒު މިހެން ވިދާޅުވީ، މިއަދު މަގާމުގެ ހުވާކުރެއްވި މޭޔަރުންނާއި، ކައުންސިލަރުން އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ (ޑަބްލިއު.ޑީ.ސީ) މެންބަރުންނަށް މަރުހަބާ ދެންނެވުމަށް އެކްސްގައި ކުރެއްވި ޕޯސްޓެއްގައެވެ.

ފައްޔާޒު ވިދާޅުވީ މިއަދަކީ ރާއްޖެއަށް މުހިއްމު ބަދަލުތަކެއް ގެންނަން ޖެހިފައިވާ ވަގުތެއް ކަމަށެވެ. ވަކިން ހާއްސަކޮށް ރައްޔިތުންގެ ފުދުންތެރިކަން މިހާރަށްވުރެ އެތައް ގުނައަކުން އިތުރުކުރަން ޖެހިފައިވާކަން އޭނާ ފާހަގަކުރެއްވިއެވެ.

"މުޅި ދައުލަތުގެ އޮނިގަނޑަށާއި ހިންގުމަށް އައު ވިސްނުންތަކެއް ގެންނާން ޖެހިފައިވާ ވަގުތެއް މިއީ،" ކުރީގެ އިގްތިސާދީ ވަޒީރުކަން ވެސް ކުރެއްވި ފައްޔާޒު ވިދާޅުވިއެވެ.

ފައްޔާޒު އިތުރަށް ވިދާޅުވީ، ގައުމަށް ބޭނުންވާ މި ބަދަލުތައް ހާސިލުކުރުމަށްޓަކައި ކައުންސިލަރުންނާއި ކައުންސިލްތަކުގެ ދައުރު ވަރަށް މުހިއްމު ކަމަށެވެ. އެގޮތުން ކައުންސިލްތަކުގެ ވިސްނުމާއި، މަޝްވަރާގެ އިތުރުން ކަންކަމުގައި އަމަލީގޮތުން ބައިވެރިވުން އިންތިހާއަށް ބޭނުންތެރި ކަމަށް އޭނާ ވިދާޅުވިއެވެ.

ފައްޔާޒު މިފަދައިން ވިދާޅުވެފައިވާއިރު، އޭނާއާއި ކުރީގެ ރައީސް ނަޝީދު އަންނަނީ ގާނޫނު އަސާސީއާއި ވެރިކަން ހިންގުމުގެ ނިޒާމަށް ބޮޑެތި ބަދަލުތަކެއް ގެނައުމާ ގުޅޭ ގޮތުން މީހުން ހޭލުންތެރިކުރުމަށް ގިނަ މަސައްކުރަމުންނެވެ.