ހދ. ހިރިމަރަދޫ ކައުންސިލާއި ހުރިހާ އަތޮޅު ކައުންސިލްތަކާއި އެ ކައުންސިލްތަކުގެ އިދާރާތައް މޭ 17 ވަނަ ދުވަހުން ފެށިގެން އުވާލައިފި އެވެ.

ރައީސުލްޖުމްހޫރިއްޔާގެ އޮފީހުން މިއަދު އާންމުކުރި ދެންނެވުމެއްގައި ވަނީ ހދ. ހިރިމަރަދޫގެ ރައްޔިތުން އެ އަތޮޅު ހަނިމާދޫއަށް ބަދަލުކުރުމަށް ނިންމާ، ހިރިމަރަދޫއަކީ މީހުން ދިރިނޫޅޭ ރަށެއްގެ ގޮތުގައި ރައީސުލްޖުމްހޫރިއްޔާ ކަނޑައަޅާފައިވާތީ، ހިރިމަރަދޫ ކައުންސިލާއި އެ ކައުންސިލްގެ އިދާރާ ވަނީ، 2026 މޭ 17 ވަނަ ދުވަހުން ފެށިގެން އުވާލާފައިވާ ކަމަށެވެ.

އަދި ލާމަރުކަޒީ ގާނޫނަށް ގެނެވުނު 17 ވަނަ އިސްލާހާ ގުޅިގެން، އަތޮޅު ކައުންސިލްތައް އުވައިލުމަށް ނިންމައި އެ ކައުންސިލްތަކުގެ އިދާރާތައް މޭ 17 ވަނަ ދުވަހުން ފެށިގެން އުވާލާފައިވާ ކަމަށް ރައީސުލްޖުމްހޫރިއްޔާ ވަނީ ކަނޑައަޅުއްވައިފަ އެވެ. މި ނިންމުމަކީ އެންމެ އަވަހަށް ބާއްވާ ލޯކަލް ކައުންސިލްތަކުގެ އިންތިހާބު ބާއްވައި، އެ ކައުންސިލްތަކަށް އަލަށް އިންތިޚާބުކުރެވޭ މެންބަރުން އެ މީހުންގެ މަގާމާ ހަވާލުވުމާއެކު ކައުންސިލްތައް އުވޭނެކަމަށް ޤާނޫނުގައި ބަޔާންކޮށްފައިވާތީ ނިންމި ނިންމުމެކެވެ.

ހިރިމަރަދޫ ރައްޔިތުން ވަނީ އެ އަތޮޅު ހަނިމާދޫއަށް ބަދަލުވާން އެދި ހުށައަޅާފަ އެވެ. އެކަން ސަރުކާރުން ގަބޫލުކޮށް އެ ރަށުގެ މީހުންނަށް ހަނިމާދޫން ބިން ހަމަޖައްސާ ގެއަޅައިދޭން ވަނީ ނިންމާފަ އެވެ. ނަމަވެސް އެެ މަސައްކަތް އޮތީ މަޑުޖެހިފަ އެވެ.

ނިމިދިޔަ ކައުންސިލް އިންތިހާބުގައި ހިރިމަރަދޫ ރައްޔިތުން ވޯޓްދިނީވެސް ހަނިމާދޫ ކައުންސިލް މެންބަރުން ހޮވުމަށެވެ.