ޑަބްލިޔުޑީސީ ރައީސާއިންގެ މުސާރަ ބޮަޑު ކުރުމާއި ގުޅިގެން އަމާޒުވަމުންދާ ފާޑުކިޔުންތަކަށް އެލްޖީއޭގެ ސީއީއޯ މުޙައްމަދު ނިމާލް ރައްދުދެއްވައިފިއެވެ. 

ޕޭ ކޮމިޝަނުން އަންހެނުންގެ ކޮމިޓީތަކުގެ މެންބަރުންގެ މުސާރައަށް ބަދަލު ގެނެސް އެކަން ވަނީ އާންމުކޮށްފަ އެވެ. އެގޮތުން އެންމެ ފުރަތަމަ ސިޓީތަކުގެ ޑަބްލިއުޑީސީ ރައީސުންގެ މުސާރަގެ ގޮތުގައި ހަމަޖެއްސީ 41,000 ރުފިޔާ އެވެ. އަދި ރަށްރަށުގެ އަންހެނުންގެ ކޮމިޓީތަކުގެ ރައީސުންގެ މުސާރައެއްގެ ގޮތުގައި 21,000 ރުފިޔާ އެވެ. 

އެއަށް އަމާޒުުވި ފާޑުކިޔުންތަކާއި ގުޅިގެން ފަހުން ޕޭ ކޮމިޝަނުން ވަނީ ސިޓީތަކުގެ ސިޓީތަކުގެ އަންހެނުންގެ ކޮމެޓީގެ ރައީސުންގެ މުސާރައަށް މަހަކު 20،000ރ. ދިނުމަށާއި އަދި ރަށްރަށުގެ އަންހެނުންގެ ކޮމެޓީތަކުގެ ރައީސުންނަށް މަހަކު 15،000ރ. ދިނުމަށް ނިންމާފައެވެ. އެކަން ނިމާލްވެސް ވަނީ ”ވޮއިސް“ އަށް ކަށަވަރުކޮށްދެއްވާފައެވެ.

އެގޮތުން ”ވޮއިސް“ އަށް ދެއްވި ބަސްދީގަތުމެއްގައި ނިމާލް ވިދާޅުވީ، ސިޓީތަކުގެ އަންހެނުންގެ ކޮމެޓީތަކުގެ ނައިބު ރައީސުންގެ އެލަވަންސް ބޮޑުކުރީ 7،000ރ. އަށް ކަމަށާ ރަށްރަށުގެ އަންހެނުންގެ ކޮމެޓީތަކުގެ ނައިބު ރައީސުންގެ އެލަވަންސް ބޮޑުކުރީ 6،000ރ. އަށް ކަމަށެވެ.

އަދި ސިޓީތަކުގެ އަންހެނުންގެ ކޮމެޓީތަކުގެ މެމްބަރުންގެ އެލަވަންސް 5000ރ އިން 6000ރއަށް ބޮޑުކުރިއިރު، ރަށްރަށުގެ އަންހެނުންގެ ކޮމެޓީތަކުގެ މެމްބަރުންގެ އެލަވަންސް 4000ރ އިން 5000ރއަށް ބޮޑުކޮށްފައިވާކަމަށް ނިމާލް ވިދާޅުވިއެވެ.

ނިމާލް އިތުރަށް ވިދާޅުވީ، ފާއިތުވެދިޔަ ދައުރު ތަކާއި ޚިލާފަށް އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސާއިންގެ ވަޒީފާއަކީ މިހާރު ފުލްޓައިމް ވަޒީފާއެއް ކަމަށެވެ. އެހެންކަމުން، އެ ވަޒީފާ އަދާކުރަމުން ސިވިލް ސާވިސްގެ އެހެން ވަޒީފާއެއް އަދާ ނުކުރެވޭނެ ކަމަށެވެ. އަދި ޑަބްލިޔުޑީސީގެ މުސާރައަށް ގެނެވުނު ބަދަލަކީ އަންހެނުން ބާރުވެރިކުރުވުމަށް މިސަރުކާރުން ކުރަމުންދާ މަސައްކަތުގެ ތެރެއިން ކުރެވުނު މުހިންމު މަސައްކަތެއްކަންވެސް ފާހަގަކުރެއްވިއެވެ. 

”މިއީ އަންހެނުން ބާރުވެރިކުރުވުމަށް ސަރުކާރުން ކުރާ މަސައްކަތުގެ އާ ބާބެއް. މީގެ ކުރިން ރައީސް މުޢިއްޒުގެ މިސަރުކާރުން ވާނީ ޑަބްލިޔުޑީސީ މުވައްޒަފުންނަށް ރަމަޟާންމަހުގެ އިނާޔަތް ލިބޭގޮތް ހަދައިދީފައި.“ ނިމާލް ވިދާޅުވިއެވެ.